Ciudadanos Galicia pecha filas ao redor de Arrimadas

O Comité Autonómico de Ciudadanos Galicia reuniuse este sábado para "pechar filas" ao redor da presidenta do partido, Inés Arrimadas, fronte ao "ruído mediático" xerado nas últimas semanas tras o intento de moción de censura en Murcia e as continuas saídas de cargos.

Antes de iniciar este encontro no Hotel Tryp de Santiago de Compostela, a coordinadora da formación en Galicia, Beatriz Pino, asegurou que seguen "convencidos" de que son "un proxecto necesario no ámbito estatal e, por suposto e máis que nunca, en Galicia".

"Seguimos na mesma liña. Tentamos abstraernos de todo o ruído mediático que ao final xeran todos os movementos que houbo", engadiu Pino, preguntada sobre as baixas que transcenderon recentemente en toda España --entre elas, a do exsecretario de Organización Fran Hervías e a do dirixente de Cs na Comunidade Valenciana, Toni Cantó, quen pasaron a filas do PP--.

Segundo a súa coordinadora en Galicia, o partido sofre un "bombardeo mediático", aínda que preferiu quirarlle importancia: "Este partido, se de algo sabe e se algo coñece de preto, é esa barreira que se nos xera sempre para tentar castigar ao centro".

"O centro é un espazo complicado, é un espazo incómodo. Somos incómodos como partido para outros ámbitos políticos que levan tanto tempo instalados no noso país", recalcou Pino. Por isto mesmo, dixo que Cs "vai seguir sendo incómodo" e chamou a "non perder un chisco de forza" para defender un proxecto "necesario".

Así mesmo, Beatriz Pino afirmou que en Galicia, "non houbo ningunha saída" de cargos orgánicos. Iso si, cabe lembrar que hai semanas o partido sufriu varias baixas na provincia de Ourense, entre elas a do seu portavoz na Deputación, Montserrat Lama.