Por E.P. | Ourense | 05/04/2021 | Actualizada ás 17:59
A Deputación de Ourense promove un estudo sobre o papel das mulleres no audiovisual galego, tanto no ámbito profesional como no dos contidos das producións estreadas en Galicia durante 2020. O estudo buscará analizar o tipo de relacións que teñen os personaxes femininos e os masculinos, os roles, estereotipos de xénero que transmiten e situacións de violencia de xénero, analizando o impacto real.
Así mesmo, estudarase se as temáticas tratadas ou o tipo de personaxes teñen algunha relacion coa composicion por sexo do equipo de dirección e produción. O presidente da Deputación, Manuel Baltar, afirmou que "é un traballo pioneiro no cinema galego" que verá a luz na próxima edición do Festival de Cinema de Ourense, que comezará o 24 de setembro
Baltar asinou este luns o convenio coa asociación de mulleres cineastas e de medios audiovisuais (CIMA) e a Fundación Carlos Velo, no que se enmarca este traballo e posteriores estudos sobre a industria audiovisual en Galicia. Así, o punto de partida para o estudo serán as series, películas, animacións e series webs de produción ou coprodución galega emitidas en cadeas públicas, privadas e mesmo plataformas de pago e posteriormente na TVG.
"É unha iniciativa cargada de relevancia pois supón un paso que non se deu ata o momento", asegurou Baltar pondo en valor que sexa na próxima edición do OUFF cando se presenten os resultados e subliñando que se trata de "unha cita moi importante" para o cinema galego. "Damos un paso máis, facendo unha mirada introspectiva cara ao audiovisual galego para ver a situación real da muller, para marcar os novos retos e ser autoexigentes", manifestou.
Pola súa banda, a representante de CIMA, Chelo Loureiro, agradeceu o apoio da Deputación e manifestou que se trata dun estudo "da representación feminina en todos os contidos". Carmen Leyte, presidenta da Fundación Carlos Velo, destacou que "o mundo audiovisual, ademais de diversión, é educación e por iso hai que saber empregalo".
ACTIVIDADES CULTURAIS
Por outra banda, esta mesma mañá a Xunta de Goberno da Deputación de Ourense aprobou as bases para as concesións de subvencións a entidades sen ánimo de lucro para a organización de actividades culturais e recreativas. Considéranse actividades culturais aquelas que "difundan, exalten ou poñan en valor o patrimonio cultural material ou inmaterial de Ourense" incluíndo desde a edición e impresión de libros ata obras audiovisuais en calquera soporte.
En canto ás recreativas, abarca actividades lúdicas de lecer de carácter público e gratuíto. De ambas poderán presentarse ata un máximo de 3 proxectos sendo a contía máxima dispoñible para a concesión de 100.000 euros. Tamén se aprobaron as subvencións de festivais, ciclos, mostras ou actividades relacionadas coas artes escénicas e musicais que se desenvolvan na provincia de Ourense e que se realicen entre o 1 de xaneiro e o 31 de decembro deste ano. Poderase presentar un máximo de tres proxectos por solicitante e a contía máxima será de 60.000 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.