Entidades sociais galegas chaman a marcar a 'X solidaria' na declaración da renda
Calculan que se os case 600.000 galegos que non a marcaron o pasado ano o fan serían 13 millóns máis para programas "máis que nunca necesarios" pola crise.
Por Europa Press / Redacción | Santiago de Compostela | 08/04/2021 | Actualizada ás 14:27
Entidades sociais galegas fan un chamamento "de auxilio" aos case 600.000 galegos que non marcaron a 'X solidaria' da renda na campaña de 2020 para que si o fagan na que acaba de arrincar este ano.
Ante a actual crise sanitaria e social, lanzan unha mensaxe "de emerxencia solidaria" a estas persoas, ao calcular que, de marcala, serían 13 millóns de euros máis os que se poderían destinar a programas "máis que nunca necesarios", para combater a pobreza e o risco de exclusión.
Un grupo de representantes e integrantes de colectivos sociais protagonizaron un breve e simbólico acto este xoves na Praza da Quintana, que se replica noutras localidades galegas e nas redes sociais.
Nel, leron un manifesto que cifra en 594.100 os galegos que non marcaron a 'X solidaria' en 2020, cando, "a pesar do confinamento, conseguiuse que case seis de cada dez galegos marcasen o recuadro". Foron, segundo os seus números, 20.000 máis que no ano anterior, o que significou un total de 20 millóns de euros, 2 máis que en 2019.
O escrito advirte da previsión dunha menor recadación debido á situación económica, e chama a que isto "non poña en perigo a supervivencia de programas e organizacións" sociais. O seu servizo, incide, é agora "máis que nunca necesario" ao estar "na primeira liña loitando contra os catastróficos efectos da pandemia" da covid.
"Non custa nada", chamaron a atención, no acto, Patricia Blanco, da xunta directiva de APN Galicia, Luciano Fernández, de Cermi e Xesús Vilas, da plataforma de organizacións da infancia galega. Á Xunta, pola súa banda, demandáronlle "que reduza a burocracia" e unifique as convocatorias de axudas para este tipo de entidades
Blanco alertou sobre o "gran incremento" na demanda dos servizos sociais que ofrecen, onde acode agora "xente cun novo perfil, que non estivera en exclusión" e á que urxiu a "sacar" desta situación para que "non se cronifique".
Pola súa banda, Fernández alertou do "incremento do empobrecemento en xeral no ámbito da discapacidade", dado o volume de traballadores en ERTE, entre outros motivos.
Mentres, Vilas chamou a atención sobre o impacto da crise nos nenos, xa que "as familias teñen cada vez máis problemas" no actual contexto.
