A Xunta apoia con 2,4 millóns de euros a entidades de comercio

A Xunta apoia con case 2,4 millóns de euros a 95 asociacións e federacións de comercio para impulsar a competitividade do sector a través da posta en marcha de iniciativas que permitirán mobilizar 3,7 millóns de euros.

A concesión de axudas da Dirección Xeral de Comercio e Consumo foi publicada esta semana polo Diario Oficial de Galicia (DOG) e aspira a dinamizar o comercio en localidades mediante iniciativas para atraer consumidores e mellorar os servizos ofertados, segundo detallou a Vicepresidencia Segunda do Goberno galego.

En concreto, destínanse 2 millóns de euros a 26 asociacións de placeiros e 56 centros comerciais abertos que inclúen iniciativas de dinamización ou de venda e promoción a través de Internet e que poderán permitir unha xestión centralizada de material de protección. A contía máxima das axudas poderá alcanzar os 9.800 euros e prevese que a liña mobilice 3,2 millóns de euros.

Así mesmo, concédense 334.000 euros a 13 asociacións de ámbito superior ao municipal e federacións que se calcula que mobilizarán uns 500.000 euros. Así, búscase impulsar o comercio de proximidade e incentivar o consumo mediante o ticket de dinamización comercial e as axudas poderán alcanzar os 49.000 euros.

Unha muller na porta dun comercio en Arteixo | Fonte: M. Dylan - Europa Press.