Por X.M. Fernández | Allariz | 27/04/2021 | Actualizada ás 09:00
O Concello de Allariz segue avanzando na súa estratexia de consolidar a eficiencia enerxética tamén no que a alumeado público se refire.
Os cambios comezaban xa no exercicio anterior nunha primeira fase, onde se levaron a cabo as modificacións a sistema Led nas luminarias das zonas do Parque Empresarial de Roiriz, no Paseo do Portovello, no Paseo da Alameda, na Estrada de Xunqueira, na Ponte de Vilanova, na Piscina Municipal e no núcleo de San Vitoiro.
E xa neste mes de abril, concretamente o día 19, comezaba a segunda fase da renovación das instalacións de alumeado, na que se substituirán unhas 1.000 luminarias a tecnoloxía LED co obxectivo de que o cambio total chegue ao 50% do total --unhas 3.900 unidades--.
Todo este proceso conseguirá que o consumo eléctrico nas zonas con sistema led se reduza nunha media do 50%, sendo incluso maior dependendo da zona. A Alcaldesa, Cristina Cid, confía en que a redución do consumo nas zonas renovadas supere ese 50%, xa que nas zonas nas que xa se fixo o cambio no exercicio anterior verificouse esa redución.
Esta segunda fase do proxecto de eficiencia enerxética, está subvencionado polo Instituto para a Diversificación e o Aforro da Enerxía ( IDAE ) nun 80%. O 20% restante será aportado pola Deputación de Ourense a través do plan provincial. Un total de algo máis de 372.000 euros será o custe total desta segunda fase e os traballos durarán uns 45 días.
Os núcleos nos que se están acometendo as melloras foron escollidos entre o IDAE e o concello priorizando os que tiñan un consumo máis elevado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.