Por E.P. | SANTIAGO DE COMPOSTELA | 26/04/2021 | Actualizada ás 17:29
Máis de 2.000 persoas puideron gozar xa do cromatismo que protagoniza a exposición aberta na Sede Afundación A Coruña 'Cromática. Mostra Internacional de Ilustración Contemporánea (MiiC)', que recolle o traballo de 19 artistas recoñecidos nacional e internacionalmente, como Agathe Storlet ou Coco Davez.
No contexto galego, algúns dos creadores cuxo traballo se pode contemplar nesta mostra son David Méndez Alonso ou Abi Castelo. A exposición continuará aberta de luns a venres de 17,00 a 20,30 horas e os sábados de 12,00 a 14,00 e de 17,00 a 20,30 horas ata o 11 de xuño.
Baixo o comisariado da especialista en ilustración Matilde Rodríguez, 'Cromática' ofrece unha antoloxía de pezas que teñen como alicerce da súa creación a ilustración e son elaboradas con moi diferentes técnicas, desde videoxogo, guache, collage e cerámica, ata a animación.
O protagonismo da cor nestas obras evoca diferentes latitudes, culturas e etnias, e convértese nun medio para reflexionar sobre a colectividade ou a identidade propia, a través de escenas oníricas, abstractas ou de retrato.
Conta, ademais, cunha destacada presenza de autoría feminina e consolida a firme vocación internacional e de uso de novas tecnoloxías. O público ten acceso, así mesmo, a detallada información de toda a mostra, mediante unha aplicación móbil, que geolocaliza na sala á persoa usuaria para irlle ofrecendo a información das pezas que ten próximas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.