A asociación Libera urxe "protexer dunha vez por todas" o lobo ibérico tras o caso da Veiga
O Seprona tivo coñecemento o pasado mes de outubro da aparición de varios animais mortos no Tecor de Caldin, no termo municipal da Veiga, entre os cadáveres localizouse un espécime de lobo ibérico, especie catalogada de interese comunitario.
Por E.P. | SANTIAGO DE COMPOSTELA | 27/04/2021 | Actualizada ás 19:46
A Asociación Animalista Libera instou este martes a "protexer dunha vez por todas" ao lobo ibérico en Galicia, reclamando "celeridade" ao Ministerio de Transición Ecolóxica para publicar o Decreto que garanta un novo status legal para o carnívoro no conxunto do Estado español.
Trasladouno despois de que este martes o Servizo de Protección da Natureza da Comandancia da Garda Civil de Ourense procedese a investigar a un veciño da Coruña por furtivismo tras matar varios exemplares no municipio ourensán da Veiga, entre eles un lobo ibérico, especie protexida.
Segundo informou o Instituto Armado, tomou declaración en calidade de investigado a F.S.J., de 67 anos de idade e veciño da Coruña, como presunto autor dun delito contra a fauna, por furtivismo.
O Seprona tivo coñecemento o pasado mes de outubro da aparición de varios animais mortos no Tecor de Caldin, no termo municipal da Veiga, entre os cadáveres localizouse un espécime de lobo ibérico, especie catalogada de interese comunitario pola Directiva 92/43 CEE.
Tras realizar varias investigacións, relataron as mesmas fontes, "localizouse un cebadeiro onde estaban colocadas cámaras de fototrampeo para ver as diferentes especies de fauna salvaxe que había no lugar, para posteriormente darlle morte".
