BNG e PSdeG lembran a Feijóo que é a Xunta quen ten as competencias en industria para dar solución a Ferrolterra

O BNG e o PSdeG coincidiron este venres ao lembrarlle ao presidente do Goberno galego, Alberto Núñez Feijóo, que a Xunta de Galicia ten as competencias en industria despois de que o máximo mandatario autonómico propuxese un pacto de Estado para a recuperación industrial de Ferrolterra.

A líder do BNG, Ana Pontón, acusou a Feijóo de tratar de "agochar as súas responsabilidades" sobre a situación crítica que atravesa" esta zona. "Porque Ferrolterra non só depende de que poida haber un barco ponte no naval. Tamén depende de que poida haber industria, de que haxa unha alternativa para As Pontes, de que se poñan en marcha medidas de reactivación estrutural...", sostivo.

Con todo, dixo que o que se está vendo é "a un Feijóo que de novo quere derivar todas as responsabilidades ao Estado" e que "non quere asumir as súas responsabilidades" cando "a Xunta ten as "competencias en materia industrial".

"Ten que haber menos titulares de prensa e máis compromisos concretos con Ferrol tanto no Boletín Oficial do Estado (BOE) como no Diario Oficial de Galicia (DOG), que é o que non vemos nin nun lado nin no outro", incidiu.

Tamén se referiron a a proposta de Feijóo o vicesecretario xeral do PSdeG, Pablo Arangüena, e o presidente da formación, Xoaquín Fernández Leicegada.

Tras lembrar que o PSdeG presentou en reiteradas ocasións propostas para reactivar a comarca de Ferrol, Arangüena criticou que Feijóo "xa diga que o pacto o ten que levar a cabo principalmente o Goberno do Estado".

"O Goberno do Estado ten competencias e facultades, pero a competencia en política industrial é exclusiva da Xunta, que non só ten que propor, senón liderar ese pacto", sinalou nunha intervención na que criticou o "escapismo constante" de Feijóo. "Nós estamos completamente abertos e dispostos a chegar a acordos para a reactivación", dixo tras emprazar a Feijóo a concretar a súa proposta.

Pola súa banda, Leiceaga lembrou que xa houbo un plan Ferrol durante o goberno do socialista José Luís Rodríguez Zapatero que permitiu "captar investimentos, industrias e servizos" pero afeou que "non houbese" ningún tipo de iniciativa durante todos os anos de goberno de Mariano Rajoy.

"E é certo que a Xunta puxo en marcha unha estratexia para Ferrol, pero nunca deu conta dos resultados", afirmou para considerar que se pode concluír que "non tivo demasiado éxito".

Pola súa banda, o secretario xeral do PPdeG, Miguel Tellado, defendeu a necesidade dun pacto de Estado no que participen as distintas administracións públicas, entre elas a Xunta "desde as súas competencias", para revitalizar Ferrol, xa que o seu "futuro" depende "de todos".

Con este obxectivo, apuntou que o Executivo galego comezará a redactar un documento cunha folla de ruta en cuxo financiamento confiou que se impliquen "todas as administracións". "O pacto de Estado require da participación indispensable do Goberno de España, a Xunta de Galicia e tamén das administracións locais, os concellos da comarca e a Deputación da Coruña", aseverou.