Por E.P. | VIGO | 01/05/2021 | Actualizada ás 18:37
A portavoz nacional do BNG, Ana Pontón, advertiu este sábado de que o Goberno de España ten "unha débeda coa clase traballadora" e que debe derrogar as "contrarreformas" laborais e das pensións, á vez que lamentou que a Xunta actúe como un goberno "de brazos caídos".
En declaracións aos medios antes de participar na manifestación convocada en Vigo pola CIG con motivo do Día Internacional dos Traballadores, Pontón subliñou que "este non é un 1 de maio máis", xa que os galegos están inmersos nunha pandemia que provocou "unha crise económica e social sen precedentes".
Nese contexto, proclamou que "é urxente" unha solución para pór freo a esa crise e lembrou que "hai 1.064 días que se desaloxou ao PP do Goberno e segue vixente a contrarreforma laboral que precarizó as condicións dos traballadores". "Hai unha necesidade imperiosa de derrogala, non valen máis escusas", apostilou.
A portavoz nacional do BNG afirmou, así mesmo, que "os gobernos teñen responsabilidades" e, por tanto, "tamén a Xunta", que é "incapaz de liderar unha saída social á crise". "Defende á banca, a algunhas empresas, pero deixa na estacada aos traballadores", denunciou, á vez que reiterou que "se necesita un plan de futuro" para Galicia.
Finalmente, Pontón subliñou que non se pode aceptar "un goberno de brazos caídos na Xunta, que siga hipotecando o futuro dos galegos", e criticou que se acepten "recortes en dereitos sociais ou pensións" para poder acceder aos fondos de recuperación económica da EU.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.