Por X.M. Fernández | Allariz | 06/05/2021 | Actualizada ás 09:30
Coincidindo coa Semana Internacional da Compostaxe (ICAW) --do 5 ó 11 de maio--, o Concello de Allariz vén de poñer en marcha unha campaña de concienciación sobre a redución, reutilización e reciclaxe dos nosos residuos en colaboración coa asociación ecoloxista galega ADEGA. A súa execución prolongarase ata o mes de novembro e estará centrada especialmente na compostaxe.
Esta campaña conta coa colaboración económica da Consellería de Medio Ambiente da Xunta de Galicia, e está cofinanciada nun 80 % polo Fondo Europeo de Desenvolvemento Rexional, sendo a inversión subvencionable de 41.471,50 euros.
DESENVOLVEMENTO DA CAMPAÑA
Farase entrega de 200 composteiros de uso individual de entre 450 e 850 litros, para a recuperación da materia orgánica producida nos fogares que dispoñan de finca, preferentemente nos núcleos rurais do municipio. Ademais disto crearanse novas áreas de compostaxe comunitaria cun total de 15 composteiros comunitarios de gran capacidade.
Con esta entrega situaríanse por riba dos 500 os composteiros de uso individual instalados no Concello, sendo o obxetivo superar o 50% na separación e reciclaxe dos residuos xerados en Allariz ao longo do ano 2021.
Paralelamente, técnicas de ADEGA executarán charlas divulgativas no CEIP Padre Feijoo e no IES de Allariz e tamén se efectuarán visitas porta a porta para a concienciación e explicación da importancia da separación, recordando que máis do 40% do lixo que producimos é de orixe orgánica.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.