Ingresan en prisión catro homes trala macrorredada antidroga de Ferrol e Narón
Outros 16 quedaron en liberdade con cargos nun operativo que está baixo segredo de sumario.
Por E.P. | SANTIAGO DE COMPOSTELA | 07/05/2021 | Actualizada ás 13:32
Catro homes ingresaron en prisión provisional comunicada e sen fianza, un deles, ademais, investigado por tenencia ilícita de armas, tras a operación realizada o pasado martes, 4 de maio, contra o tráfico de drogas nos municipios de Ferrol e Narón.
Segundo trasladaron a Europa Press fontes do Tribunal Superior de Xustiza de Galicia (TSXG), o caso está baixo secretario de sumario e no operativo, que mobilizou un gran número de axentes da Policía Nacional, practicáronse entradas e rexistros en 19 vivendas, 16 delas situadas nos municipios de Ferrol e Narón, tanto en asentamentos chabolistas como en vivendas unifamiliares, e o tres restantes na Coruña, unha delas na zona das Rañas.
En total, a disposición do Xulgado de Instrución número 1 de Ferrol, en funcións de garda, pasaron 22 persoas, 18 homes e catro mulleres, todas elas investigadas por un delito contra a saúde pública e outro de pertenza a organización criminal.
SEGUINTES COMPARECENCIAS
Así, ao día seguinte da operación, o mércores, día 5, pasaron once persoas a disposición xudicial, das cales unha ingresou en prisión. O xoves foron oito os detidos presentado ante o xuíz, que decretou o ingreso en prisión de tres deles. Por último, este venres, 7 de maio, pasaron a disposición xudicial outras tres persoas e todas foron postas en liberdade.
