A nova APP da Seguridade Social permitirá realizar 40 trámites desde o móbil ou o computador
"Calquera traballador ou traballadora pode visualizar todos os seus datos e coñecer a súa situación actual ou a súa vida laboral", explicou a subdelegada do Goberno en Pontevedra, Maica Larriba.
Por E.P. | PONTEVEDRA | 18/05/2021 | Actualizada ás 16:32
A subdelegada do Goberno en Pontevedra, Maica Larriba, e o director provincial da Tesouraría Xeral da Seguridade Social, Juan Herrera, presentaron este martes a ferramenta Import@ss, chamada a modernizar a relación entre a cidadanía e este organismo, que permitirá ter perfís e espazos personalizados onde o contribuínte terá toda a información e datos persoais que necesite, coa posibilidade de realizar ata 40 trámites desde o móbil ou o computador.
Segundo han detellado, trátase dun novo portal web, que está dispoñible en teléfonos móbiles, computadores e tabletas e que permite obter información, consultar situacións concretas e datos, e realizar trámites en liña dunha maneira fácil e sinxela. A nova web conta cunha páxina principal de acceso público e unha área persoal.
Na páxina principal é posible atopar toda a información necesaria para realizar calquera trámite ou xestión coa Tesouraría Xeral da Seguridade Social. Larriba indicou que, entre outras xestións, "nesta zona pódese obter a vida laboral, o número da Seguridade Social, xestionar un alta no Réxime de autónomos ou dar de alta a un empregado ou empregada do fogar".
Na área persoal, unha vez que se accede cos medios de identificación habilitados, "calquera traballador ou traballadora, independentemente da súa situación laboral, pode visualizar todos os seus datos e coñecer a súa situación actual, a súa vida laboral ou outras situacións específicas", explicou a subdelegada.
Dentro dos 40 trámites que o portal facilita dedicouse un apartado moi especial para ás persoas que traballan ou empregan no ámbito do fogar, unhas 8.285 na provincia de Pontevedra fronte aos 9.592 empregadores "hai máis empregadores que empregados porque en moitos casos os seus contratos son por horas ou media xornada", explicou a subdelegada.
Ademais incluíuse un simulador que calcula a cota mensual que se pagaría ao dar de alta a un traballador ou traballadora do fogar, ao indicar quen realizará o alta, os datos da xornada e o salario mensual máis as pagas extra.
Pola súa banda, o director provincial da Tesouraría Xeral da Seguridade Social incidiu nun proxecto que é "accesible, claro, sinxelo e personalizado". Juan Herrera indicou que "con esta nova ferramenta, centrada na cidadanía", pretenden achegarse aos autónomos, empregados do fogar e cidadáns "co obxectivo de aumentar o uso dos servizos dixitais", engadiu.
Por último, Herrera realizou un chamamento á cidadanía da provincia para que faciliten o seu teléfono á Tesouraría Xeral da Seguridade Social, un trámite necesario e moi útil, xa que permite recibir avisos e acceder a Import@ss, entre outros. Para dar de alta o teléfono móbil é necesario chamar ao teléfono gratuíto 91 54 10 291. Na actualidade, o 72 por cento dos empregados e o 71% dos empregados do fogar da provincia xa proporcionaron o seu número de contacto á Tesouraría.
