Galicia morre: crecen as mortes un 5% en 2020 e descenden un 3,2% os nacementos
Houbo 17.610 falecementos máis que nacementos, o que sitúa ao pais co terceiro peor dato de crecemento vexetativo do Estado.
Por Europa Press / Redacción | Santiago de Compostela | 17/06/2021 | Actualizada ás 13:04
Galicia rexistrou en 2020 un total de 32.822 mortes, un 5% máis que no ano anterior, incremento que é tres veces e media inferior ao da media, segundo os datos que publica este xoves o Instituto Nacional de Estatística (INE), que ten como fonte de información os boletíns de defunción do Rexistro Civil.
En concreto, o repunte de falecidos na comunidade galega o pasado ano, o do estalido da pandemia de coronavirus, é o segundo menor por autonomías, tan só por encima do de Canarias (+4,2%).
A taxa bruta de mortalidade situouse no caso galego en 12,2 defuncións por cada 1.000 habitantes, o que deixa á comunidade co sexto maior dato. Mentres, a esperanza de vida ao nacer alcanza en Galicia os 83,3 anos, o terceiro maior dato por comunidades autónomas.
En canto aos nacementos, 15.212 en 2020 na comunidade galega, a cifra representa un descenso do 3,2% en comparación con 2019, pero é a terceira diminución menos acusada o conxunto estatal. O indicador de fecundidade conxuntural fixouse en 1,02 fillos por muller, fronte a 1,18 da media.
Así as cousas, o crecemento vexetativo, que pon en relación os nacementos coas defuncións, rexistrou o pasado exercicio en Galicia un valor negativo de -17.610, que sitúa á comunidade como terceira pola cola.
DATOS ESTATAIS
En canto ao conxunto estatal, o número de mortes en España incrementouse un 17,7% durante 2020, , segundo os datos provisionais das Estatísticas do Movemento Natural da Poboación (MNP).
En concreto, durante 2020 faleceron en España 492.930 persoas, o máximo desde 1941, en plena posguerra. Por meses, destacan os aumentos de defuncións en marzo e abril, do 56,8 e 78,2 por cento, respectivamente, respecto dos mesmos meses do ano anterior, coincidindo co peor momento da pandemia.
Igualmente, sobresae a evolución da mortalidade a partir do mes de agosto, en plena segunda onda: sobre todo en outubro e novembro, cando o número de defuncións incrementouse un 21 e un 21,6 por cento, respectivamente, respecto de 2019.
De acordo cos datos do INE, morreron 6.280 persoas de máis de 100 anos (21,6% máis), 35.859 de 95 a 99 anos (+22,3%), 86.999 de 90 a 94 (+21%), 107.202 de 85 a 89 (+19%), 73.924 de 80 a 84 (+16,2%), 52.303 de 75 a 79 (+24%), 38.752 de 70a 74 (+15,6%), 27.502 de 65 a 69 (+15%), 21.930 de 60 a 64 (+13,6%), 15.823 de 55 a 59 (+9,3%), 10.366 de 50a 54 (+4,7%), 6.038 de 45 a 49 (+4,2%), 3.559 de 40 a 44 (+10,8%), 1.945 de 35 a 39 (+4,5%), 1.213 de 30 a 34 (+11,6%) e 3.235 menores de 30 (-2,9%).
