O CSIC estuda a sensibilidade de cinco tipos de vides galegas á enfermidade do mildiu
O estudo céntrase en setenta e sete variedades minoritarias procedentes de diversas partes do Estado.
Por E.P. | Santiago de Compostela | 21/06/2021 | Actualizada ás 15:25
Unha investigación avanza no estudo da sensibilidade á enfermidade coñecida como 'mildiu' de 77 variedades minoritarias de vide procedentes de todas as comunidades autónomas de España, entre elas cinco de Galicia, con susceptibilidade baixa ou media ao patóxeno.
O Consello Superior de Investigacións Científicas (CSIC), a través do grupo Viticultura, Oliveira e Rosa da Misión Biolóxica de Galicia (MBG) avanza nesta investigación tras máis de dous anos de traballo de laboratorio.
Segundo informa o CSIC, trátase dun subproxecto dirixido por Carmen Martínez desde a MBG coa participación do resto dos investigadores do grupo: José Luís Santiago, Pilar Gago e Susana Boso, e a colaboración de 16 grupos de investigación de diferentes comunidades autónomas españolas que, á súa vez, forma parte dun proxecto global coordinado por Gregorio Muñoz, do Instituto Madrileño de Investigación e Desenvolvemento Rural, Agrario e Alimentario, e financiado polo Plan Estatal de Investigación Científica e Técnica 2017-2020.
O proxecto global inclúe dous subproxectos máis e está previsto que todas as investigacións conclúan en decembro de 2022.
RESULTADOS
Un 45% das variedades mostraron sensibilidade intermedia ao patógeno, fronte a un 21%, elevada e un 17% aleatoria dependendo da mostraxe, segundo indica Susana Boso, outra das investigadoras do grupo.
No primeiro grupo, o de elevada susceptibilidade, os investigadores diferencian entre as que presentaron unha incidencia maior do 75% e severidade e densidade maior do 50% (Raiada Melonera de Andalucía, Tottozona Tinta de Navarra ou Tinto Jeromo de Castela-León).
As variedades con susceptibilidade baixa presentaron unha incidencia menor do 50%, severidade menor do 20% e unha densidade menor do 35%. É o caso de Morate de Madrid, Sanguina de Cataluña e Tinta Redonda do País Vasco.
As variedades con susceptibilidade intermedia foron aquelas con unha elevada incidencia pero severidade ou densidade por baixo do 50%. Neste grupo atópanse algunhas de procedencia galega como Albilla do Avia e Ratiño.
Nestes momentos, están a brotar no invernadoiro as estaquillas das 77 variedades enviadas de novo este ano, e proximamente se inocularán en laboratorio. O obxectivo é comprobar se as que eran moi sensibles ou pouco o ano anterior continúan séndoo este ano, avanzan os investigadores do CSIC.
