Miriam Ferradáns, Patricia Hermida e Cláudia Morán, finalistas do Premio Afundación de Xornalismo
O xurado do XVIII Premio Afundación de Xornalismo Fernández del Riego seleccionou estes tres textos entre os 29 presentados.
Por Europa Press / Redacción | SANTIAGO DE COMPOSTELA | 07/07/2021 | Actualizada ás 17:50
Miriam Ferradáns, Patricia Hermida e Cláudia Morán son as finalistas do XVIII Premio Afundación de Xornalismo Fernández del Riego, segundo se deu a coñecer este mércores nun acto na sede da Obra Social de Abanca de Pontevedra.
Deste xeito, Miriam Ferradáns compite polo seu artigo 'Dallas', publicado o 10 de novembro de 2020 en Nós Diario; Patricia Hermida, por 'Historia de como avó Antonio subiu ao ceo', publicado o 5 de maio de 2020 no Correo Galego; e Cláudia Morán por 'Un deserto', publicado o 18 de novembro de 2020 en Nós Diario.
O xurado estivo integrado por: Víctor Freixanes, Carlos Vale, Fina Casalderrey, Gloria Rodríguez e Cristina Pato. Este tres artigos foron seleccionados entre un total de 29 textos, que podían ser artigos de opinión ou de xornalismo literario escritos en lingua galega. O premio está dotado con 10.000 euros.
Na rolda de prensa, o director xerente de Afundación, Pedro Otero, destacou a "calidade dos textos presentados" e a "ardua tarefa de selección por parte do xurado".
Pola súa banda, o presidente da Real Academia Galega (RAG), Víctor Freixanes, subliña a "calidade, precisión e esmero" dos traballos.
