Javier Solana recibe o XXV Premio Grupo Compostela pola "súa actuación a favor" do Camiño
Solana percorreu as distintas rutas do Camiño durante máis de dúas décadas, tanto a pé como en bicicleta.
Por E.P. | Santiago de Compostela | 12/07/2021 | Actualizada ás 18:54
O xurado do XXV Premio Internacional Grupo Compostela-Xunta de Galicia concedeu o galardón ao exministro español de Cultura Javier Solana de Madariaga pola súa "a súa actuación a favor dos principais fitos da ruta xacobea", entre os que sobresae a cerimonia organizada en 1987 con motivo da declaración do Camiño de Santiago como primeiro itinerario cultural europeo por parte do Consello de Europa.
Ademais, os membros do xurado destacan no fallo o seu "permanente compromiso social" e a súa traxectoria internacional, ao longo da cal contribuíu ao "desenvolvemento dos valores europeos de cooperación, integración, diversidade, tolerancia e unidade que rodean" á ruta de peregrinación.
Ao comunicarlle a decisión, o premiado declarado que "sempre" mantivo "unha relación especial con Santiago, a cidade e o Camiño". Así mesmo, manifestou o seu desexo de que "Santiago continúe sendo un lugar tranquilo, de conversación serena e de paz". Cabe lembrar que percorreu as distintas rutas do Camiño durante máis de dúas décadas, tanto a pé como en bicicleta.
PREMIO DE 6.000 EUROS
A celebración da cerimonia de entrega está prevista para o 13 de setembro no marco da XXV Asemblea Xeral do Grupo Compostela de Universidades, que este ano organizará a Universidade de Santiago de Compostela.
Nesta cerimonia recibirá unha cuncha de ouro, emblema da rede de institucións de Educación Superior, e un premio en metálico de 6.000 euros brutos.
TRAXECTORIA
Francisco Javier Solana de Madariaga é un político e diplomático español cunha notoria traxectoria no ámbito nacional e internacional. Foi ministro de Cultura de España (1982-1988), de Educación e Ciencia (1988-1992) e de Asuntos Exteriores (1992-1995).
Ademais, foi secretario xeral da OTAN (1995-1999), alto representante de Política Exterior e de Seguridade Común da Unión Europea (1999-2009) e comandante en xefe da EUFOR (1999-2009).
En canto á súa carreira académica, Javier Solana é doutor e catedrático en Ciencias Físicas pola Universidade Complutense de Madrid (España). Tras obter a licenciatura nesta universidade, continuou a súa formación no Reino Unido e os Estados Unidos de América, onde realizou os seus estudos de posgrao.
Actualmente, preside EsadeGeo-Centro de Economía e Xeopolítica Global de ESADE, o Real Padroado do Museo do Prado, Aspen Institute España, e a comisión executiva do Instituto de Saúde Global Barcelona. Tamén pertence aos padroados da Fundación Bancaria A Caixa e da Fundación Telefónica.
O Premio Internacional Grupo Compostela-Xunta de Galicia creouse en 1996 por mor da firma dun acordo entre o Grupo Compostela de Universidades (GCU) e a Consellería de Cultura, Comunicación Social e Turismo para a súa creación.
Desde a súa primeira convocatoria en 1997, este recoñecemento foi outorgado a personalidades como como Jacques Santer (1997), Vaclav Havel (1998), Carla del Ponte (2001) ou Mohamed AlBaradei (2010).
