Amoestan á Xunta por ocultar información sobre unha plantación "ilegal" de eucalipto

O TSXG vén de fallar en favor da plataforma ADEGA, que demandaba coñecer información sobre unha sanción. Apuntan que a Xunta lles negou o informe alegando que unha plantación ilegal non era "información ambiental".

Por Galicia Confidencial | SANTIAGO DE COMPOSTELA | 14/07/2021 | Actualizada ás 22:00

Comparte esta noticia

Novo golpe ao “escurantismo” da Xunta de Galicia a respecto da súa xestión ambiental. Desta vez, o impacto dos tribunais non vén da parte da chamada “avalancha eólica”, senón noutra das grandes frontes contra a que se implica o movemento ecoloxista da comunidade: o eucalipto. O TSXG vén de “amonestar” a administración autonómica por non terlle achegado información á plataforma ADEGA sobre unha plantación “ilegal” de eucalipto.

Arquivo - Repoboación de eucalipto na Fonsagrada a 22 de abril de 2021, en Lugo, Galicia (España).. Carlos Castro - Europa Press - Arquivo
Arquivo - Repoboación de eucalipto na Fonsagrada a 22 de abril de 2021, en Lugo, Galicia (España).. Carlos Castro - Europa Press - Arquivo

O fallo do TSXG, contra o que non cabe recurso, ratifica así a decisión do xulgado contencioso-administrativo de Lugo que admite a demanda de ADEGA e contra o que se postulou en recurso a Xunta de Galicia despois de que este lle dera a razón á plataforma ecoloxista. Segundo apuntan dende a mesma, a Xunta ten agora un mes para dar esa información dende que a sentencia sexa firme. 

Ao parecer, ADEGA ten dereito a coñecer a información relativa a este informe sancionador por tratarse dunha entidade sen ánimo de lucro que, ao cumprir os requisitos da Lei 27/2006 --de carácter estatal--, pode “recorrer omisións imputables ás autoridades públicas que vulneren as normas relacionadas co Medio Ambiente”.

O argumentario da Xunta para non ofrecer esta información teríase baseado, din dende a plataforma, en que a cuestión da plantación ilegal de eucaliptos non tiña carácter ambiental, un razoamento que a plataforma cualifica de “absurdo e inxustificábel”. E iso que “segundo o TSXG, a denegación por parte da Consellaría de Medio Rural da condición de interesada a ADEGA e do acceso á información contida neses expedientes, estaría furtando de facto o dereito da entidade ecoloxista [de poder desenvolver este control]”, aseguran.

ARGUMENTARIO "ABSURDO"

Tal foi o argumento da Xefatura Territorial de Medio Rural en Lugo cando, en 2017, fundamentou a súa negativa de dar acceso á información solicitada pola asociación ecoloxista ADEGA ao entender que dita información non tiña carácter ambiental, “malia a atender aos procedementos sancionadores por dúas plantacións ilegais”. “Incluso chega a cuestionar que unha plantación ilegal (neste caso de eucaliptos, tras corta tamén irregular de bosque autóctono) teña que ter necesariamente unha incidencia ambiental”, enganden.

Dende a plataforma consideran que este feito é representativo da “concepción nesgada e cativa de información ambiental” da Xunta, “restrinxindo esta só a aquela que, ou ben afecta a espazos naturais protexidos, ou ben faga referencia a feitos que precisen do pronunciamento expreso da Consellaría de Medio Ambiente”. A plataforma sostén que a “opacidade administrativa” da man da Xunta aumentou tras o cambio da Xefatura Territorial de Lugo, comandada pola alcaldesa de Triacastela Olga Iglesias Fontal dende 2017. 

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta