Inician os trámites para regularizar os senegaleses que tentaron protexer a Samuel Luiz
Dende a Subdelegación do Goberno recoñecen as "circunstancias excepcionais" do proceso pero destacan a importancia da súa "actitude humanitaria".
Por Europa Press / Redacción | SANTIAGO DE COMPOSTELA | 20/07/2021 | Actualizada ás 12:57
A Subdelegación do Goberno na Coruña remitiu na mañá deste martes á Secretaría de Estado de Migracións o informe favorable para a concesión da residencia ás dúas persoas de nacionalidade senegalesa que auxiliaron a Samuel Luiz durante a agresión mortal do pasado 3 de xullo.
Así o informou a Delegación do Goberno nun comunicado, no que explica que a subdelegada do Goberno na Coruña, María Rivas López, destacou que os dous cidadáns senegaleses "merecen o recoñecemento oficial por parte do Estado pola actitude mantida durante o tumulto que concluíu coa morte de Samuel Luiz". Neste sentido, alude ás "circunstancias excepcionais" que caracterizan a esta solicitude de residencia, "tendo en conta que ambas as persoas puxeron de manifesto unha destacada actitude humanitaria, pondo mesmo en risco a súa vida", subliña.
Deste xeito destácao o informe complementario realizado pola Brigada da Policía Xudicial da Coruña, que, puntualizan as mesmas fontes, "significa que un deles conta coa condición de vítima, ademais de testemuña, ao ser tamén agredido mentres trataba de socorrer ao falecido pondo por tanto en risco a súa propia vida".
No informe da área de Estranxeiría da Subdelegación do Goberno e subscrito por María Rivas recoméndase tamén que as autorizacións de residencia da autorización de Ibrahima e Magatte leven aparelladas as autorizacións de traballo, tendo en conta que figura acreditada unha oferta de emprego para ambos.
DE OFICIO
A Subdelegación do Goberno da Coruña, a través da súa área de Estranxeiría, iniciou de oficio, e de acordo coa Secretaría de Estado de Migracións, o proceso de solicitude de residencia das dúas persoas que auxiliaron a Samuel Luiz da agresión que sufriu e que acabou coa súa vida.
Con esta medida, tal como significa a subdelegada do Goberno "preténdese recoñecer e premiar os valores humanos das dúas persoas que arriscaron as súas propias vidas por defender a Samuel".
Unha vez remitido o informe desde a Subdelegación do Goberno será agora a Secretaría de Estado de Migracións a encargada de concluír o proceso de posible regularización administrativa das dúas persoas.
