Por Europa Press / Redacción | Meirás | 21/07/2021 | Actualizada ás 18:21
A Delegación do Goberno instou ao vicepresidente segundo e conselleiro de Economía e Industria, Francisco Conde, a que asine o protocolo de convenio de 'Transición Xusta' das Pontes para, desta maneira, "avanzar no proceso de concreción dos novos investimentos na localidade", e pide ademais "unha maior implicación" da Xunta de Galicia.
A Delegación sinalou nun comunicado que, así, daríase "resposta ás demandas da comarca e dos traballadores da central térmica", e apuntou ademais que o conselleiro "cambiou o seu criterio sobre o futuro das Pontes", e pediu "concrecións".
Neste sentido, lembrou que "esas concrecións levan meses encima da mesa sen que a Xunta firme o protocolo que permita estudar alternativas e investimentos". A Delegación "espera" que o cambio de criterio do conselleiro "permita desbloquear o convenio e, así, fixar novos investimentos que garantan os postos de traballo e fixar a poboación no rural".
A Mesa de Transición das Pontes reúne aos representantes do Ministerio para a Transición Ecolóxica e o Reto Demográfico, da Xunta de Galicia, do Concello das Pontes, da empresa titular da central térmica, da Asociación Empresarial das Pontes e dos sindicatos para "planificar accións conxuntas que aseguren unha transición xusta na zona".
O delegado do Goberno en Galicia, José Miñones, reiterou o compromiso do Executivo coas Pontes e coa Mesa para "o futuro da comarca, a única con carácter específico, á que corresponde a elaboración dun plan de desenvolvemento para atopar alternativas á actividade de xeración eléctrica con carbón tal e como se viña desenvolendo, entre outras actividades".
Tamén cualificou de "fundamental" a necesidade dunha unidade de acción institucional e sindical, polo que a decisión da Xunta de participar activamente neste órgano debe de ser ratificada cunha maior implicación do Goberno galego".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.