Gonzalo Caballero resalta a necesidade de "actualizar" o Estatuto de Autonomía tras a pandemia
O secretario xeral do PSdeG sinalou que "o galeguismo ten que seguir impregnando o socialismo galego para os retos de futuro" e coa vista posta en "impulsar a reactivación e a reconstrución" de Galicia.
Por Europa Press / Redacción | SANTIAGO DE COMPOSTELA | 23/07/2021 | Actualizada ás 18:48
O PSdeG conmemorará este domingo 25 de xullo o Día de Galicia coa tradicional ofrenda floral á estatua de Castelao en Rianxo e, ao fío desta celebración, o máximo dirixente do PSdeG, Gonzalo Caballero, reivindicou a renovación do "compromiso galeguista e federalista" dos socialistas galegos: "Traballamos en Galicia, por Galicia e para Galicia".
"O noso compromiso é cos galegos e coas galegas", defendeu o dirixente socialista, despois de subliñar que "a historia do PSdeG é tamén a historia de Galicia".
E por iso, sinalou, "o galeguismo ten que seguir impregnando ao socialismo galego para os retos de futuro" e coa vista posta en "impulsar a reactivación e a reconstrución" de Galicia "para que ninguén quede atrás".
Ao fío disto, o líder socialista destacou o "proxecto feminista, ecoloxista, federalista e de esquerdas" do PSdeG para "protexer" aos galegos. "É o momento de reafirmar ese galeguismo pola esperanza e o futuro no noso país", sentenciou.
REITERA QUE SOBRE A MESA ESTÁ "ACTUALIZAR" O ESTATUTO TRAS A PANDEMIA
Con todo, Caballero puxo en valor que este ano se cumpren 40 anos do Estatuto de Autonomía e reiterou que, superada a pandemia, tocará abordar "o reto de actualizalo" para así "garantir novos dereitos para os galegos e galegas do século XXI".
"Fai falta facelo para dar compromiso e esperanza ás novas xeracións de galegos e galegas que queren vivir nun modelo actualizado ao século XXI", sentenciou.
ACTO DE RIANXO
O acto de Rianxo contará coa presenza do secretario xeral do PSdeG, Gonzalo Caballero, e coas intervencións do catedrático de Dereito e exministro de Xustiza do Goberno de España, Francisco Caamaño; e da expresidenta do Parlamento de Galicia, Lola Villarino.
Tamén contará coa participación do presidente do PSdeG e senador, Xoaquín Fernández Leiceaga; do presidente da Federación Galega de Municipios e Provincias (Fegamp), Alberto Varela; da portavoz de Cultura do Grupo Socialista na Cámara galega, Noa Díaz; así como da portavoz socialista en Rianxo, María del Carmen Figueira. A conmemoración do Día de Galicia finalizará cunha actuación do cantautor Luís Emilio Batallán.
