A Xunta pídelle ao Goberno central un "incremento orzamentario" dos servizos de dependencia
Galicia avoga por implantar "pasarelas" que axilicen a valoración de discapacidade para os grandes dependentes.
Por Europa Press / Redacción | Compostela | 26/07/2021 | Actualizada ás 13:46
A Xunta de Galicia defendeu este luns ante o Goberno central, durante a reunión do Consello Territorial de Servizos Sociais, a implantación das chamadas "pasarelas" que permitirán simplificar e axilizar o recoñecemento da discapacidade a aquelas persoas grandes dependentes.
Ademais, reclamou ao Estado "un incremento orzamentario" da súa achega ao financiamento da dependencia para dar cumprimento coa lexislación, que establece que as administracións central e autonómicas custearán a partes iguais --ao 50 por cento-- estes servizos.
Todo iso explicouno o director xeral de Atención Integral Sociosanitaria, Antón Acevedo, durante unha intervención aberta aos medios para abordar a postura levada pola Xunta ao Consello Territorial, órgano no que estiveron presentes a ministra de Dereitos Sociais e Axenda 2030, Ione Belarra, e o resto de conselleiros autonómicos do ramo.
Neste encontro, as comunidades aprobaron as bases para chegar "a un acordo de mínimos" en canto á renovación do sistema de dependencia. Neste contexto, Galicia mostrouse favorable a este traballo conxunto para chegar a "solucións comúns", pero incidiu en que ten que estar acompañado de máis fondos por parte do Estado.
RECOÑECEMENTO DE DISCAPACIDADE E DEPENDENCIA
Ademais, abordaron a necesidade de mellorar o real decreto que regula o recoñecemento da discapacidade e a dependencia. "É un paso acertado que temos que dar", asegurou Acevedo, para seguidamente valorar como "interesante" a implantación desas "pasarelas entre a dependencia e a discapacidade".
Isto serviría, detallou o director xeral, para que a unha persoa gran dependente se lle recoñeza "xa, practicamente sen maior complexidade, o grao de discapacidade". E é que actualmente son dous "procesos distintos" e "moitas veces" quen o solicita "non ten moi claro que ten que pedir".
