Por Europa Press / Redacción | PONTEVEDRA | 27/07/2021 | Actualizada ás 20:18
O Xulgado Contencioso-Administrativo número 1 de Pontevedra ratificou a decisión do concello da capital por mor da clausura dunha vivenda de uso turístico situada no quinto piso dun edificio situado no centro da cidade.
Tras a denuncia dunha veciña e a consecuente investigación municipal, o Goberno local denegoulle a actividade. Ante o recurso da propietaria afectada, o ditame xudicial deu a razón á Administración local.
"No concello de Pontevedra as vivendas de uso turístico de momento non son un problema", sinalou o concelleiro de Urbanismo, Xaquín Moreda, aínda que o Plan Xeral de Ordenación Municipal establece que este "uso terciario" en bloques de vivendas se permite "en planta baixa ou en primeira planta", mentres que a partir da primeira planta "só autorízase o uso residencial".
Moreda precisou que o concello non actúa de oficio nas autorizacións referidas a uso turístico, non así no caso das Áreas de Rehabilitación Integral. "Hai propietarios de vivendas que solicitaron axudas á rehabilitación para uso residencial e estanas usando para aluguer e uso turístico", sinalou o edil nacionalista. Nestes casos, o concello incoou expediente "para que o propietario devolva a axuda que solicitou".
Precisamente, aos propietarios de vivendas de uso turístico no centro histórico que solicitaron ese tipo de subvencións para a rehabilitación denegáronselles as peticións.
"A entidade que autoriza ou ten unha lista de vivendas de uso turístico é a Xunta, que xa coñece a posición do concello", precisou o concelleiro de Urbanismo de Pontevedra.
Nese sentido, o Goberno local insistiu en que o uso terciario está limitado a través do Plan aos baixos e primeiras plantas, polo que "é a Xunta a que ten que regularizar a súa lista de vivendas de uso turístico e quitar as que están nesa situación", concluíu Moreda.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.