Médicos de familia consideran necesaria a terceira dose da vacina contra a Covid "canto antes"
Din que se incrementaron os casos nas residencias de persoas de máis idade e persoas fráxiles que van necesitar como mínimo un ingreso hospitalario.
Por Europa Press / Redacción | LUGO | 02/08/2021 | Actualizada ás 12:03
O portavoz da Sociedade Española de Médicos Xerais e de Familia, o lucense Lorenzo Armenteros, manifestou este luns que resulta necesario que a terceira dose da vacina contra a Covid-19 se administre "canto antes".
Armenteros comentou que "esta onda (a quinta) ten unhas características diferentes ás anteriores pola poboación á que está a afectar". "A medida que vai pasando o tempo estamos a detectar que os contaxios están a estenderse a persoas doutras idades e a persoas vacinadas", sinalou.
Este médico lucense advertiu que a subida de contaxios "era previsible porque estas vacinas non teñen o carácter esterilizante que permitiría a posibilidade de non transmitir o virus, o que evita é a progresión da enfermidade", matizou.
Isto conduciu a que "se vexa cada vez máis persoal contaxiado que xa tiña as dúas doses e entre este persoal podemos destacar que se contaxian máis sanitarios". "Si que é certo que a enfermidade non afecta dunha maneira tan grave pero pode chegar a afectar porque tamén se incrementaron os casos nas residencias de persoas de máis idade e persoas fráxiles que van necesitar como mínimo un ingreso hospitalario e esperemos que as UCIs non se recarguen", avisou.
"É necesario que a terceira dose sirva para previr consecuencias posteriores e non vaiamos detrás dos acontecementos e adminístrese a terceira dose unha vez cos casos desorbitados", recomendou.
