Rescatado con vida un home que flotaba no medio da Ría de Ferrol
Foi rescatado por uns pescadores sobre as 07.30 da mañá.
Por Europa Press / Redacción | SANTIAGO DE COMPOSTELA | 10/08/2021 | Actualizada ás 10:11
Un home foi rescatado con vida e trasladado despois de ser localizado cando flotaba no medio da Ría de Ferrol na mañá deste martes. Segundo relatou o 112 Galicia, foron uns pescadores que se atopaban na zona os que, ás 7,30 horas, contactaron co 112 Galicia para avisar do achado dunha persoa que flotaba no mar, próxima á zona da Ermida de Caranza.
Por iso, por parte do CIAE-112 púxose a información en coñecemento de Salvamento Marítimo, do Servizo de Gardacostas de Galicia, da Policía Nacional e Local de Ferrol, dos servizos sanitarios de urxencia e de Protección Civil do concello.
Unha vez no punto, os axentes da Policía Local comunicaron ao 112 que o home xa fora rescatado polos pescadores e que se atopaba fora da auga. Pola súa banda, o 061 confirmou o traslado da persoa ao Hospital Arquitecto Marcide, en Ferrol.
