Piden sinaturas masivas para frear o parque eólico Meirama e o proxecto hidroeléctrico do lago das Encrobas

A plataforma SOS Encrobas, apoiada polos avogados da asociación de Bergantiños Petón do Lobo e pola Asociación Salvemos a Comarca de Ordes, lanzan un chamamento a toda a poboación, tanto dos Concellos de Cerceda, Ordes e Carral como de toda Galicia para que se mobilicen en contra do Parque Eólico Meirama e do proxecto de aproveitamento hidroeléctrico do Lago das Encrobas.

Desde a organización consideran que tanto un proxecto como o outro son "un exemplo máis do continuo espolio ao que as empresas eléctricas, nunca saciadas, queres someter a este país, para beneficio propio e en detrimento da veciñanza". Advirte que, de saír adiante o Parque Eólico de Meirama proxectado, deixaría ás aldeas da zona "totalmente rodeadas de muiños xigantes". Os núcleos que se verían afectados de forma directa son: Croeda, Morzós, A Enfesta, Poloio, A Lousa, Casa Cancela, Poboado do Piñeiro, Rego da Iña e Virís no Concello de Cerceda; A Cabra e Pousada no Concello de Carral e A Brea, Casas de Orellán, Casas das Raposeiras, Vilasenín, A Espiñeira e Porta de Nó no Concello de Ordes. 

Así mesmo, tamén chaman a toda a poboación a alegar contra o proxecto de aproveitamento hidroeléctrico privado do lago das Encrobas. Consieran que non é de recibo que se pretenda privatizar de novo a zona e un ben público como a auga. "Non queremos máis industrias irresponsables, queremos que se recupere naturalmente toda a zona e que se lle devolvan as terras ao pobo para un aproveitamento sustentable e respectuoso", indica SOS Encrobas.

O prazo para presentar alegacións está aberto ata o 7 de setembro para o parque eólico Meirama e ata o 20 de agosto para o lago das Encrobas. A organización pon a disposición pública un documento modelo de alegacións que calquera persoa pode presentar nun rexistro da Administración pública.