O lecer nocturno na ruína: denuncia que facturou este agosto o 6,37% do facturado no mesmo mes de 2019
Aposta por reiniciar mobilizacións.
Por Europa Press / Redacción | SANTIAGO DE COMPOSTELA | 26/08/2021 | Actualizada ás 10:43
Os locais de lecer nocturno galegos facturaron no mes de agosto deste ano o 6,37 por cento dos ingresos que obtiveron no mesmo período de 2019. Así se desprende do informe realizado pola asociación Galicia de Noite que, xunto a España de Noche presentou os resultados do VII estudo sobre o impacto da crise da covid no sector do lecer e espectáculos.
A realización do estudo compara a situación do sector durante o segundo verán da crise pola pandemia con respecto ao verán de 2019. Neste sentido, o estudo revelou que os locais galegos apenas alcanzaron o 6,37% do que se facturou en 2019, "moi por baixo" da media nacional, que se atopa no 11,46 por cento.
Con respecto á percepción do sector a nivel nacional sobre o funcionamento do verán, "tendo en conta as expectativas favorables que xeraban o final do estado de alarma e a evolución positiva da enfermidade durante a pasada primavera", o sector fai unha "valoración crítica e moi negativa" da xestión política da última fase da crise do coronavirus.
Nunha escala de 1 a 10 para valorar o cumprimento das expectativas que tiña o sector sobre como ía funcionar o verán, os empresarios consideran que apenas alcanzou o 1,6 de puntuación.
Unicamente o 8,2% dos enquisados cubriron as expectativas que tiñan para este verán, e para o 91,8% "a xestión política do final do estado de alarma resultou desastrosa para a reactivación da actividade do lecer e os espectáculos".
En relación coas axudas económicas que recibiu o sector en Galicia, "nun escenario tan dramático como o anterior, as pemes galegas "apenas recibiron axudas por parte das administracións, e unicamente por un 14,21% do valor das perdas acumuladas", neste caso, "un pouco por encima do 12,5 por cento nacional" durante estes 17 meses.
MOBILIZACIÓNS
No estudo, hase testado que o 96,2% das empresas consultadas en toda España ("centenares") considera que "a situación actual de sector é insustentable e que resulta necesario reactivar o calendario de actos de protestas e mobilizacións", para reclamar as axudas económicas necesarias para compensar "a súa crítica situación".
Ademais, reclaman a un plan para a reactivación do sector con carácter inmediato, que "permita recuperar a súa actividade ao 100%, durante o próximo mes de setembro".
Con respecto ás causas do "fracaso desta tempada de verán", destaca que o 83,2% dos enquisados en España considera que a principal causa da súa "ruína" durante este mes de agosto "foron as restricións impostas polas comunidades autónomas aos locais de lecer", e que "impediu contar cun dique de contención fronte ao lecer irregular e festas e aglomeracións que se están vendo repetidamente nos medios de comunicación".
Ademais, o 80,5% das pemes considera que foi "a incapacidade de afrontar a problemática do botellón por parte das administracións", a causa da evolución negativa da tempada no verán, seguida da "incapacidade" de implantar o certificado sanitario para un 72,3%. En último lugar, "a pésima xestión" do Goberno central do final do estado de alarma, cun 72,2%.
