A operación retorno do verán en Galicia: 54 accidentes, tres mortos e 85 feridos
Case o 50% dos atendidos son de entre 15 e 29 anos.
Por Europa Press / Redacción | SANTIAGO DE COMPOSTELA | 30/08/2021 | Actualizada ás 12:51
A operación retorno de verán en Galicia, activa desde as 15,00 horas do 27 de agosto ata as 23,59 horas do 29 de agosto, saldouse con 54 accidentes de circulación e 85 persoas asistidas por Urxencias Sanitarias de Galicia-061.
Das 85 persoas asistidas nestes 54 accidentes, tres faleceron, 73 foron trasladadas aos centros sanitarios correspondentes e ao nove restantes atendéuselles no propio lugar dos feitos.
Outros datos que se arroxan deste período é que a proporción de asistidos por xénero foi dun 67% de homes e un 33% de mulleres. En canto aos datos de idade, Urxencias Sanitarias destacou que o 48% dos atendidos atópase na franxa de idade entre os 15 e 29 anos.
En 72 casos foi necesario mobilizar recursos sanitarios. Deles, a gran maioría corresponden a ambulancias asistenciais de soporte vital básico, que atenderon a 57 sinistros. Os 15 restantes repártense da seguinte maneira: sete ambulancias medicalizadas de soporte vital avanzado; un helicóptero medicalizado; e sete equipos sanitarios de Atención Primaria.
En canto aos accidentes, repartíronse de forma equilibrada a razón de 18 sucesos ao día. Producíronse de forma case maioritaria na provincia de Pontevedra, con 26 sinistros dos 54. Séguelle A Coruña, con 15, Ourense e Lugo pechan a lista, con sete e seis respectivamente.
