Xunta e viticultores analizan os efectos da declaración de emerxencia cinexética polo xabaril
Entre as 29 comarcas galegas na que está aprobada a medida, figuran algunhas das que maior actividade vitivonícola concentran.
Por Europa Press / Redacción | SANTIAGO DE COMPOSTELA | 02/09/2021 | Actualizada ás 15:24
A directora xeral de Patrimonio Natural, Belén do Campo, e representantes dos consellos reguladores dalgunhas denominacións de orixe (DO) vitivinícolas presentes en Galicia mantiveron este xoves unha reunión para analizar os efectos para o sector da declaración da emerxencia cinexética temporal polo xabaril, vixente desde o pasado venres en gran parte da Comunidade.
Diso informou a Consellería de Medio Ambiente nun comunicado, no que sinala que entre as 29 comarcas galegas nas que se aplicará esta medida ata o próximo 27 de febreiro figuran algunhas das que concentran unha maior actividade vitivinícola, un dos sectores agrícolas nos que nos últimos anos se constataron máis danos derivados dos ataques destes animais.
Conforme sinalou a Xunta, os representantes do sector presentes na reunión --a presidenta do consello regulador da DO Monterrei, Lara da Silva; o presidente do consello regulador da DO Ribeira Sacra, José Manuel Rodríguez; o xerente do consello regulador da DO do Ribeiro, Luís Vázquez; e o director do órgano de control do consello regulador da DO Rías Baixas, Agustín Lago-- coincidiron en sinalar a preocupación entre os viticultores galegos polas perdas económicas derivadas dos xabaríns e celebraron a medida adoptada pola Xunta nas súas comarcas.
Pola súa banda, Belén do Campo recoñeceu o impacto destes animais sobre as viñas en moitas zonas de Galicia --especialmente na provincia de Ourense, onde conflúen catro das cinco DO-- e de feito lembrou que este sector é un dos que se pode acoller á orde de axudas para paliar os danos producidos por esta especie.
Nesta liña, explicou que, por esta razón, a Consellería de Medio Ambiente tivo unha especial sensibilidade coas comarcas vinícolas á hora de ponderar e decidir onde declaraba a emerxencia cinexética temporal polo xabaril.
Así, indicou que na decisión pesaron cinco variables e a súa incidencia en cada comarca: superficie afectada e proporción desta con relación ao territorio total destinado a cultivos en cada zona; número de avisos por danos; accidentes de tráfico causados por esta especie; e peso das explotacións porcinas respecto ao censo galego total.
O departamento autonómico lembra que é a segunda vez que a Xunta decide recorrer á emerxencia cinexética temporal, unha medida extraordinaria prevista no regulamento de caza para cando nunha comarca exista unha determinada especie que resulta especialmente perigosa para as persoas ou prexudicial para a agricultura, a gandaría, os montes ou a propia actividade cinexética.
A finalidade deste instrumento é axilizar a aplicación práctica de medidas orientadas ao control das poboacións desta especie, a través de distintas modalidades e procedementos de captura, naquelas zonas que concentran unha maior incidencia. Así, durante a vixencia da declaración permitirase abater ou capturar, sen límite de exemplares, xabaríns de ambos os sexos, prioritariamente femias adultas e subadultas; ampliaranse os períodos nos que se pode exercer a actividade cinexética; e estará autorizado o uso de medios auxiliares que favorezan a eficacia e o óptimo aproveitamento cinexético.
Segundo indicou a Xunta, os representantes dos consellos reguladores comprometéronse a difundir entre os produtores o contido destas medidas así como a instituir na importancia de que se notifique sempre a través do 012 os danos causados pola especie.
