Cinco parques eólicos entrarán este ano en servizo en Galicia

O vicepresidente económico da Xunta, Francisco Conde, informou de que un total de cinco parques eólicos entrarán este ano en servizo en Galicia, que terán unha dotación conxunta de 70 megawatts. Diso informou Conde en resposta a unha pregunta do BNG no pleno do Parlamento, na que expuxo que en 2020 non se aprobou ningún parque eólico en Galicia.

Pola súa banda, Rosana Pérez (BNG) indicou que as comarcas de Barbanza e Muros-Noia son "un claro exemplo de ocupación abusiva e extrema polas empresas eólicas", pois de saír adiante os proxectos existentes, poderían duplicarse as 20 instalacións actuais, a potencia "multiplicaríase por tres" e sumaríanse 114 muíños aos 400 en funcionamento, segundo alerta.

Así, Pérez chamou a atención sobre o "megaparque" eólico que se prevé no monte da Pena, entre os municipios de Outes e Negreira, que contará con "un falso fraccionamento". Avisa de que haberá algúns muíños a "escasos 500 metros das numerosas aldeas", un espazo con patrimonio arqueolóxico identificado, como sete mámoas e oito castros, o que "debería estar protexido hai moito tempo".

Sobre este extremo, Conde indica que se tramita ese parque pola declaración de impacto ambiental ordinaria, o que supón "todas as garantías" e conta con "todos os informes favorables", "incluído o do Concello de Negreira". Así, remarca que "tramitar un parque non significa a súa autorización", mentres que non se vai a dar a autorización a ningún parque que "non cumpran" con todos os requisitos.

Con todo, reprochou ao Bloque que no sector eólico "está no non polo non", xa que "se visten de pancarta permanentemente".

Parque eólico de Greenalia en Vimianzo / Greenalia. / Europa Press