Anulada polo TSXG a baixada de tarifas do bus aprobada na Coruña coa Marea Atlántica, que pide recorrer o fallo
"A Compañía de Tranvías tivo uns enormes beneficios de 3,3 millóns de euros en 2019, mesmo tras aplicar a rebaixa das tarifas", apunta esta formación.
Por E.P. | A CORUÑA | 04/10/2021 | Actualizada ás 20:48
O Tribunal Superior de Xustiza de Galicia (TSXG) anulou a baixada das tarifas do bus urbano aprobada durante o mandato da Marea Atlántica, que pediu ao goberno local que recorra a decisión.
Nun comunicado, afirma que o fallo xudicial, resultado das diverxencias a este respecto entre Tranvías da Coruña e o anterior goberno local, é "contrario ao interese xeral da Coruña" e pide á alcaldesa, Inés Rey, que "esgote todas as vías xudiciais en defensa dunha medida que multiplicou o uso do transporte público na cidade".
"A Compañía de Tranvías tivo uns enormes beneficios de 3,3 millóns de euros en 2019, mesmo tras aplicar a rebaixa das tarifas", apunta esta formación.
A Marea Atlántica explica que estas ganancias foron "sinaladas como excesivas para unha concesión pública pola Comisión Nacional dos Mercados e Competencia (CNMC) nun informe de 2018 e pola sentenza inicial do xulgado do contencioso", sinala fronte ao fallo xudicial do TSXG tras o recurso da compañía concesionaria.
Desde a Compañía de Tranvías, e á espera dunha análise máis detallada da sentenza, o seu director, Ignacio Prada, indicou que confían en que, de adoptar a sentenza un carácter firme, "poña fin a unha situación de inseguridade xurídica" que, ao seu xuízo, impedía o "desenvolvemento normal" da actividade.
Tamén confía en que esta resolución "axude á recuperación da normalidade da explotación e ao consenso" co consistorio coruñés.
