A Xunta reduce á metade os prazos de tramitación dunha planta de biometano en Sarreaus tras declarala prioritaria
A decisión enmárcase na Lei de simplificación administrativa.
Por E.P. | Santiago de Compostela | 15/10/2021 | Actualizada ás 14:11
O Goberno galego declarou como iniciativa empresarial prioritaria o proxecto de desenvolvemento dunha planta de biometano no concello de Sarreaus, na provincia de Ourense, o que permitirá axilizar e reducir á metade os prazos de tramitación.
O proxecto suma un investimento de 8,27 millóns de euros e prevé a creación de 16 postos de traballo, segundo os datos trasladados pola Xunta.
A declaración como iniciativa empresarial prioritaria da construción desta fábrica enmárcase na Lei de simplificación administrativa, que permite axilizar os prazos ao mesmo tempo que se manteñen as garantías xurídicas durante o procedemento. Deste xeito, "poténciase a captación de investimentos para Galicia e a creación de emprego de calidade", destaca o Goberno galego.
Esta planta encargarase da produción de gas renovable a partir da valorización de diferentes substratos de orixe orgánica e que serán utilizados como materia prima do proceso.
A iniciativa empresarial foi declarada como prioritaria por cumprir dous dos requisitos necesarios: polo volume de investimento así como por complementar cadeas de valor e pertencer a sectores estratéxicos, neste caso o enerxético.
A empresa Bioenergía Ourense calcula que terá dispoñibles unhas 70.000 toneladas ano de materia orgánica, procedente de diferentes empresas agroalimentarias e do sector industrial localizadas en zonas próximas á planta.
A partir do procesamiento desta materia orgánica, producirase unha primeira corrente de biogás, que será posteriormente depurada mediante un proceso de enriquecemento.
