O acusado de tentar matar a súa parella en Lalín enfróntase a 14 anos de cárcere

A Sección Cuarta da Audiencia Provincial de Pontevedra acollerá o xoves o xuízo contra un home para o que Fiscalía solicita 14 anos de prisión por tentar matar a súa muller, coa que estaba en trámites de divorcio, en 2019 en Lalín. Os feitos ocorreron o día 15 de abril do citado ano sobre as 22,00 horas. O matrimonio, segundo relata o Ministerio Público, comezou unha discusión nos exteriores do seu domicilio con motivo do uso do vehículo.

Nese momento, cando a muller se atopaba no asento do condutor, o acusado "atacouna sacando un coitelo de 10 centímetros de folla" do peto do seu abrigo co que primeiro a golpeou na fronte. Tanto a vítima como o fillo de ambos, que se atopaba no interior do coche, trataron de quitarlle a arma.

O home tentou cravarlle o coitelo no pescozo en varias ocasións, co que conseguiu provocarlle feridas de varios centímetros. Ela mordeulle a man e logrou que a arma caese ao chan, momento no que o seu fillo aproveitou para collelo e escapar ata a casa dunha veciña. Deste xeito, a agresión finalizou.

O acusado, que ingresou en prisión provisional dous días despois dos feitos, enfrontarase a 14 anos de cárcere por un delito de asasinato en grao de tentativa, polo que Fiscalía tamén solicita unha prohibición de achegarse a menos de 300 metros da vítima, o seu domicilio, lugar de traballo ou onde se atope, así como a prohibición de comunicarse con ela por calquera medio ou procedemento durante 20 anos.

Ademais, solicitará que pague á muller unha indemnización de 3.750 euros polas lesións e polas secuelas sufridas --máis intereses--, á parte de 811,12 euros ao Servizo Galego de Saúde (Sergas) pola atención médica prestada.

Audiencia Provincial de Pontevedra.