As ciberestafas e homicidios ou asasinatos increméntanse máis dun 50% respecto a 2020
O número de delitos no que vai de ano crece un 14% en comparación con 2020, primeiro ano da pandemia.
Por Europa Press / Redacción | Compostela | 04/11/2021 | Actualizada ás 19:29
As estafas informáticas representan xa un de cada seis delitos que se cometeron en Galicia no que vai de ano tras incrementarse un 51% en comparación con 2020. Este aumento da ciberdelincuencia fixo repuntar a taxa de criminalidade en Galicia, que sobe ata os 30,5 delitos por cada 1.000 habitantes, tres puntos máis que no pasado ano.
Así o recolle o balance de criminalidade publicado este xoves polo Ministerio do Interior, que reflicte un incremento do 46% nas estafas auspiciado polo aumento das cometidas a través de Internet, que foron 12.650 das 19.044 rexistradas nos primeiros nove meses do ano.
E é que as estatísticas recollen un aumento das estafas informáticas do 51,1%, polo que xa son un de cada seis delitos cometidos en Galicia, comunidade na que a taxa de criminalidade aumentou tres puntos respecto ao ano pasado ata situarse nos 30,5 por cada 1.000 habitantes.
Por provincias, A Coruña e Pontevedra presentas taxas similares, con 32,8 e 31,5 delitos por cada 1.000 habitantes, mentres que a cifra é inferior en Ourense (26,6) e en Lugo (23,4). Así as cousas, Galicia rexistrou un total de 62.490 infraccións penais de xaneiro a setembro, un 16,9% máis que en 2020, ano marcado pola pandemia que obrigou a decretar o confinamento domicialario e a ditar medidas de redución da mobilidade.
Deste xeito, aumentan os delitos en todas as tipoloxías penais salvo en roubos con forza (-17%), furtos (-19%), subtraccións de vehículos (-19,9%) e tráfico de drogas (-15%). O maior incremento porcentual dáse en homicidios e asasinatos, ao pasar dos nove de 2020 aos 14 no que vai de ano, un 55,6% máis. Tamén destaca o crecemento dos delitos contra a liberdade e a indemnidad sexual, que pasaron de 406 a 521 este ano, un 28,3% máis.
Entre eles, resalta o incremento do 32,6% nas agresións sexuais con penetración (un total de 61 polas 46 de 2020), mentres que o resto de delitos deste tipo subiron un 27,8%.
