Gómez-Reino pregunta polos riscos da instalación dun parque eólico sobre o patrimonio en Castro Valente
O secretario xeral de Podemos Galici advertiu de que o proxecto repercutirá negativamente no xacemento arqueolóxico de Castro Valente, un dos elementos fortificados máis grandes de Galicia, e auqe situaría un muíño a 200 metros.
Por E.P. | SANTIAGO DE COMPOSTELA | 11/11/2021 | Actualizada ás 20:15
O deputado de Unidas Podemos e secretario xeral de Podemos Galicia Antón Gómez Reino preguntou ao Goberno polos riscos da posible instalación dun parque eólico no patrimonio arqueolóxico de Castro Valente.
En senllas preguntas rexistradas no Congreso e dirixidas aos ministerios de Transición Ecolóxica e Cultura, o parlamentario denuncia as posibles afeccións sobre áreas de interese natural e pide ao Goberno que tome medidas para evitar a súa instalación.
"O monte galego está sobrecargado de eólicos. Pedimos unha paralización de todos estes proxectos, xa superamos o obxectivo de produción renovable estipulado para o ano 2030", sinala Gómez Reino, que asegura que "o único motivo polo que continúan é polo interese de Feijóo en apoiar ás grandes empresas".
O deputado de Unidas Podemos sostén que o parque eólico de Castro Valente sitúase nos municipios de Padrón, Pontecesures, A Estrada e Valga, conformado por catro aerogeradores de 145 metros de altura e unha potencia total de 18 megawatts. Un destes muíños, segundo sinala, situaríase nunha zona de interese comunitario e, á súa vez, na zona protexida de Augas Potables do Ulla.
Ademais, advertiu de que o proxecto repercutirá negativamente no xacemento arqueolóxico de Castro Valente, un dos elementos fortificados máis grandes de Galicia, e auqe situaría un muíño a 200 metros.
Ante iso, instou ao Ministerio de Cultura a intervir en seguimento do estipulado na Lei de Patrimonio Histórico Español para "garantir a conservación e protección do xacemento". "Hai que fomentar un modelo enerxético sustentable para a natureza e xusto para as comunidades en lugar de espremer o noso medioambiente para dar diñeiro aos amigos do PP", argumentou.
