O servizo de Dixestivo do hospital de Pontevedra logra por segundo ano un galardón pola súa atención á hepatite C

Dos 1.150 pacientes tratados, o 98% están curados.

Por E.P. | SANTIAGO DE COMPOSTELA | 17/11/2021 | Actualizada ás 17:06

Comparte esta noticia

O servizo de Aparello Dixestivo do Complexo Hospitalario Universitario de Pontevedra (CHUP) foi recoñecido por segundo ano consecutivo co galardón nacional Best in Class 2021 á Mellor Unidade de Hepatite C en Atención ao Paciente.

O xerente da área sanitaria de Pontevedra e O Salnés, José Ramón Gómez, acompañado polo xefe de servizo do Aparello Dixestivo, Juan Turnes e o representante da Asociación Galega de Deportistas Transplantados e en Diáleses (Detradi Galicia), Carlos Sánchez Montes presentaron este mércores nunha comparecencia as diversas iniciativas que lles levaron a recibir este premio que Turnes valorou como un éxito colectivo.

O xefe de servizo do Aparello Dixestivo do CHUP sinalou que o reto para o próximo ano sería non recibir o premio "porque xa non fixese falta" ao pasar a ser unha área sanitaria "libre" de hepatite C.

1.150 PACIENTES, 98% CURADOS

O servizo de Aparello Dixestivo da área Sanitaria de Pontevedra e o Salnés suma xa máis de 1.150 pacientes tratados, dos que máis do 98% xa están curados. Ademais, estímase que a cifra de pacientes con Hepatites C non diagnosticados na área sanitaria de Pontevedra e O Salnés veu reducida nun 90% nos últimos anos.

Este servizo consolidou desde o ano 2015 un amplo abanico de medidas tales como a creación de circuítos de identificación de novos casos e acceso rápido a tratamentos, a implantación pioneira en Galicia do diagnóstico da Hepatite C nunha única mostra de sangue, o acceso aos ensaios clínicos e o uso da Intelixencia Artificial no marco do programa FOCUS Galicia.

Esta patoloxía é un problema de saúde pública moi grave, coñecida como a pandemia silenciosa, xa que non presenta síntomas ata que está nun estadio moi avanzado.

A hepatite C afecta a mais de 7 millóns de persoas a nivel mundial e ata a aparición dos novos tratamentos antivirais era a principal causa de cirrosis hepática, cancro de fígado e transplante hepático. En concreto, España é recoñecida pola Organización Mundial da Saúde (OMS) como o país máis avanzado para eliminar a hepatite C antes do ano 2024, tan só por detrás de Islandia.

Juan Turnes destacou o significado especial de recibir este premio e o do ano pasado nuns momentos "tremendamente complicados" pola pandemia do covid-19.

Estes galardóns, que convoca anualmente a publicación especializada Gaceta Médica xunto coa Cátedra de Innovación e Xestión Sanitaria da Universidad Rey Juan Carlos, teñen como obxectivo principal recoñecer publicamente a aqueles centros sanitarios que buscan a excelencia na atención que prestan aos seus pacientes.

Complexo Hospitalario Universitario de Pontevedra (CHUP).
Complexo Hospitalario Universitario de Pontevedra (CHUP).

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta