A Xunta defende en Bruxelas a prevención do abandono de terras para facer fronte ao despoboamento

O director xeral de Relacións Exteriores e coa UE, Jesús Gamallo, defendeu en Bruxelas a importancia de previr o abandono de terras para facer fronte ao reto demográfico. Gamallo foi o representante galego na reunión da Comisión de Recursos Naturais (NAT) do Comité Europeo das Rexións (CdR), na que se debateu este luns sobre a resposta que debe dar a UE aos retos das zonas rurais.

Durante a última reunión do ano, a comisión NAT deu o visto e prace ao proxecto de ditame sobre a visión "a longo prazo das zonas rurais", o documento estratéxico que presentou a Comisión Europea o pasado mes de xullo co obxectivo de mellorar a calidade de vida e a resiliencia das zonas rurais para o ano 2040.

A proposta da Comisión consta, fundamentalmente, da creación dun foro de discusión multinivel denominado Pacto Rural e dunha serie de iniciativas (Plan de Acción Rural) que pretenden prestar apoio político á xestión das zonas rurais a través da PAC e da política de cohesión.

Galicia introduciu unha emenda ao borrador de ditame do CdR para resaltar a importancia de recuperar as terras agroforestais infrautilizadas mediante un marco normativo adecuado, financiamento e novos instrumentos de xestión das terras.

A Xunta considera clave esta cuestión para facer fronte ao reto demográfico no rural, dado que fixa poboación ao territorio.

No documento aprobado este luns, reivindícase o papel da agricultura, a mobilidade, a conectividade dixital e as enerxías renovables para frear o despoboamento e para xerar oportunidades sociais e económicas nas zonas rurais.

Pide tamén normas de aplicación máis simples para os fondos europeos nesas zonas e que se complementen mellor entre si os diferentes fondos que chegan a elas.