A Cámara galega pídelle a Madrid que prezo do leite cubra custos de produción
Os grupos acordan pedirlle á Xunta a formar en dixitalización ao comercio e a elaborar campañas de promoción entre os mozos.
Por E.P. | SANTIAGO DE COMPOSTELA | 24/11/2021 | Actualizada ás 14:30
A Cámara galega aprobou este mércores unha proposición non de lei defendida polo PPdeG a través da que reclaman ao Ministerio de Agricultura a posta en marcha dunha batería de medidas orientadas a que o prezo do leite cubra os custos de produción.
A iniciativa, que foi presentada pola deputada popular Elena Candia, insta o departamento que dirixe Luís Planas a habilitar mecanismos que garantan o cumprimento da Lei de Cadea Alimentaria, actualmente en tramitación, co obxectivo de que "todos os elos da cadea de valor láctea cobren polo seu produto un prezo que cubra os custos de produción", en particular os gandeiros.
Así mesmo, pide o cumprimento da solicitude realizada pola Xunta para que no texto final da Lei de Cadea Alimentaria recolla medidas para recoñecer os resultados económicos da conta láctea ou outras aplicacións oficiais, como forma de acreditación do custo efectivo de produción.
Tamén demanda impulsar campañas de concienciación do consumidor final sobre o papel esencial do sector primario, reforzar a promoción dos produtos lácteos galegos, apoiar a demanda de base territorial dos gandeiros e axilizar a constitución do Observatorio Lácteo Galego.
A proposición non de lei contou coa abstención da oposición, que considerou necesaria a actuación do Goberno galego nesta cuestión. En concreto, o parlamentario nacionalista Xosé Luís Rivas 'Mini' acusou ao PPdeG de non facer "nada" nos seus 12 anos de goberno na Xunta para "intermediar" polos galegos e criticou que os populares traten de "substituír as organizacións sindicais agrarias" por organizacións de produtores.
Pola súa banda, o socialista Martín Seco instou ao PPdeG a "deixar de marear a perdiz" e "tomar medidas" dentro das súas competencias. "Asuman que son goberno e axuden ao desenvolvemento das actividades do noso rural", reclamou.
MEDIDAS PARA O COMERCIO
Por outra banda, na sesión, tamén foron aprobados varios puntos dunha iniciativa defendida pola socialista Leticia Galego que pedía unha serie de medidas en apoio ao comercio galego.
En concreto, a proposición non de lei incluía un primeiro punto que reclamaba á Xunta que incrementase o orzamento para 2022 destinado a este sector, ao denunciar que se reducía en 5 millóns. Este apartado non saíu adiante ao solicitar os populares a votación por puntos, unha opción que aceptou a deputada socialista.
Así as cousas, si saíron adiante co apoio do tres grupos da Cámara galega os puntos que pedían á Xunta fomentar a orientación, información e asesoramento ao sector comercial galego, así como a formación continúa en dixitalización do sector do comercio. Tamén se acordou a elaboración de campañas e promocións para que a xente moza compre no pequeno e mediano comercio, así como a posta en marcha dun programa para fomentar a substitución xeracional no sector.
