Prohibidas as protestas en Vigo ante a visita do Príncipe
Varias asociacións critican que se lle teñan denegado permisos para realizar actos de protesta que se realizan diariamente e que nada teñen que ver con esta visita.
Por Galicia Confidencial | Vigo | 21/03/2014 | Actualizada ás 10:00
A plataforma de afectados por abusos bancarios denuncia que a subdelegación do Goberno en Pontevedra denegoulle o permiso para concentarse diante de varios bancos da cidade como levan facendo diariamente desde hai seis meses. A razón desta situación está na visita do Príncipe Felipe a esta cidade.
Este grupo leva meses protestando diante dos bancos, principalmente, diante do Banco Popular, por ser o que ten a cláusula do chan máis alta de toda Galicia e negarse en banda a negociar con moitos dos afectados.
Para estas protestas piden sempre un permiso á Subdelegación de Goberno, que non foi denegada en ningún caso salvo para o día concreto da visita do Príncipe de Asturias, que acudirá a Pontevedra para unha comida da confederación de empresarios.
Avisar con antelación
Como excusa, a subdelegación esixiulle a esta plataforma que debía comunicar con dez días de antelación a concentración. "O mesmo ten pasado co resto de plataformas de protesta bancaria que fixeron o propio para o mesmo día: permiso denegado", denuncia.
Por eso, critica esta situación e lembra a importancia destas reivindicacións. "Hai casos coñecidos de quen se quitou a vida para tentar que a súa familia viva da indemnización pertinente", apunta. A plataforma chama á alarma social por este feito, e insiste que "violencia é traballar toda a vida para non ter nin os dereitos por cuxa reinvindicación xa encarceraron a moitos".
Visita principesca
O Príncipe Felipe visitará a cidade para o acto de engrega da Medalla de Ouro que lle fará a Confederación de Empresarios de Pontevedra (CEP) en recoñecemento ao seu labor como "embaixador dos servizos, produtos e empresas españolas, fortalecendo e impulsando os intercambios e axudando a equilibrar a nosa balanza comercial".
O acto culminará cunha comida no Hotel Los Escudos e previamente o Príncipe estará en Santiago presidindo un acto na Cidade da Cultura con motivo da inauguración da exposición "Auga Doce".
