Representantes da CIG concéntranse ante a refinaría de Repsol para esixir unha "transición galega xusta"

Representantes da CIG concentráronse ante a refinaría de Repsol, na Coruña, para esixir unha "transición galega xusta" no sector dos carburantes e biocarburantes.

Tamén demandaron que se garanta, no marco do proceso de descarbonización da economía, a posta en marcha de alternativas de reindustrialización e creación de postos de traballo nos territorios afectados.

A protesta terá continuidade o vindeiro xoves, 2 de decembro, cunha concentración, ás 14,45 horas, na planta de Vertex Bioenergy de Curtis, mentres que o xoves, 9 de decembro, as reivindicacións trasladaranse á planta de Masol Iberia Biodiésel de Ferrol, ás 10,00 horas.

Con estas mobilizacións, explicou o secretario xeral da CIG, Paulo Carril, a central nacionalista quere demandar das empresas investimentos e medidas para afrontar o proceso de descarbonización da economía e reclamar dos gobernos plans de actuación "para que realmente haxa unha transición e non unha demolición".