Ultras deportivistas berran palabras ofensivas contra residentes ferroláns horas antes do partido Ferrol-Depor
Unha patrulla da Policía Local de Ferrol localizou a este grupo e decidiu realizar un seguimento dos mesmos, en vista de que puidese producirse algún altercado, algo que finalmente non aconteceu.
Por E.P. | Ferrol | 04/12/2021 | Actualizada ás 17:01
Unha trintena de ultras do Deportivo proferiron á primeira hora da noite deste venres, 3 de decembro, varias consignas ofensivas contra os residentes de Ferrol, horas antes do derbi que enfrontará a partir das 19,00 horas deste sábado, día 4, no estadio da Malata, a Racing de Ferrol e Deportivo da Coruña.
Os mozos percorreron varias rúas do barrio da Magdalena ao berro de "Coruña" e "Deportivo", mesturados con diversos cánticos, ademais de realizar proclamas como "ferroláns, fillos de p....".
Unha patrulla da Policía Local de Ferrol localizou a este grupo e decidiu realizar un seguimento dos mesmos, en vista de que puidese producirse algún altercado, algo que finalmente non aconteceu, xa que estes montáronse nos vehículos nos que se desprazaron e acto seguido abandonaron a cidade.
Segundo algunhas fontes consultadas por Europa Press durante os días anteriores xa apareceron algunhas pintadas ofensivas tanto na zona do estadio da Malata como no local de hostalaría que frecuentan algúns dos seguidores máis radicais do Racing de Ferrol. Este partido foi declarado de alto risco.
