O escritor Camilo Franco reinvéntase coa app "Piso Franco", unha readaptación do libro de peto
Trátase dunha aplicación de contido literario e xornalístico que se actualiza cada semana e dispoñible en catro linguas.
Por Galicia Confidencial | Ourense | 09/12/2021 | Actualizada ás 11:29
O escritor, xornalista e creador Camilo Franco volve reinventarse e lanza, na véspera do Nadal, 'Piso Franco': unha aplicación de literatura breve dispoñible nas principais plataformas móbiles e en catro idiomas: galego, portugués, inglés e castelán.
O narrador ourensán, que xa fixera literatura en páxinas web e en redes sociais, defende que a literatura debe adaptarse en cada momento ao soporte favorito do público e para demostralo publica a primeira aplicación móbil de contido literario e xornalístico do mundo. “O sorprendente é que que non sucedera antes”, afirma.
Piso Franco -que xa está dispoñible nas tendas de app de Apple e Android cun prezo de oferta de 9,99 euros e que a partir do 15 de xaneiro custará 14,99 euros anuais- ofrece, no momento do seu lanzamento, un volume de relatos similar ao que ofrecería un libro convencional ao que se irá engadindo contido novo cada semana.
Segundo informan, o 25% dos contidos son de acceso libre para quen descargue a aplicación, e ao resto só se pode acceder despois de pagar a cota anual. Para Camilo Franco, esta "novidosa aplicación" é “a nova versión do libro de peto”, a maneira na que un autor do 2021 pode comunicarse cos lectores, ao tempo que establece con eles e elas unha relación comercial de "tipo liviano".
O autor defende que usar esta aplicación é "moito máis sinxelo que usar Instagram" e afirma que o contido será “heterodoxo”: maioritariamente será literario, aínda que tamén haberá crítica, reporteirismo teórico e opinión máis ou menos decorada con realidades ou, viceversa, realidade máis ou menos decorada con opinión. “Un tipo de traballo”, salienta o autor, “que foi perdendo espazo no xornalismo, salvo en dúas ou tres firmas determinadas”.
A idea fundamental é que a narrativa breve ten outro soporte e que ese soporte vai condicionar dalgunha maneira o contido. Por un lado, polas actualizacións semanais e, polo outro, porque vai haber unha participación activa das lectoras e dos lectores, principalmente a través das redes sociais (Piso Franco ten perfís en Facebook, Twitter e Instagram). “Se é verdade iso que din os románticos de que a literatura é un bálsamo nos confinamentos”, engade Camilo Franco, “e xa está no móbil, non sei que máis podemos facer”.
