Un paso máis para a sinalización e divulgación das áreas con risco de inundación de Galicia-Costa

A Consellería de Infraestruturas licita este luns o servizo para a sinalización das áreas con risco de inundación da demarcación hidrográfica Galicia-Costa e para a súa divulgación, por máis de 853.000 euros.

As empresas interesadas en desenvolver este contrato poderán presentar as súas ofertas ata o próximo 20 de xaneiro e esta actuación contará con cofinanciamento polo Fondo Europeo de Desenvolvemento Rexional (Feder).

O obxectivo é reforzar a concienciación sobre o risco de inundacións nesta demarcación e de forma específica, en áreas de risco potencial significativo.

Para isto, levará a cabo unha campaña específica de sinalización destes puntos e tamén iniciativas de sensibilización dirixidas ao conxunto da cidadanía.

Así, instalaranse paneis informativos e divulgativos en cada zona inundable e o contrato prevé unha campaña a través de redes sociais e páxinas web, a través de diversos recursos audiovisuais e infográficos.

Tamén haberá accións de formación para escolares destas zonas con risco de inundacións, con talleres en colexios e material didáctico específico.