O CGPJ aproba o reforzo do xulgado de familia de Ourense ata xuño de 2022
O TSXG deu o visto e prace á renovación sen relevación de funcións a favor de Luís Doval Pérez, titular do Xulgado de Instrución número 2 de Ourense.
Por E.P. | SANTIAGO DE COMPOSTELA | 30/12/2021 | Actualizada ás 13:45
A Comisión Permanente do Consello Xeral do Poder Xudicial (CGPJ) aprobou renovar a medida de apoio para reforzar o Xulgado de Primeira Instancia número 6 de Ourense, especializado en dereito de familia, determinación da capacidade e internamentos.
Segundo informa o Tribunal Superior de Xustiza de Galicia (TSXG), deu o visto e prace á renovación da comisión de servizo sen relevación de funcións a favor de Luís Doval Pérez, titular do Xulgado de Instrución número 2 de Ourense.
A medida de apoio estableceuse, polo menos, ata o próximo 30 de xuño. Este maxistrado farase cargo da metade dos internamentos non voluntarios, urxentes e residenciais, así como dos expedientes con números rematados en 1, 2, 3 e 4, pois a titular do órgano asumirá a tramitación do seis números restantes.
Para tomar esta decisión, a Comisión Permanente tivo en conta a evolución e o estado do órgano a reforzar. A dedicación media do Xulgado de Primeira Instancia número 6 de Ourense foi moi superior ao módulo establecido en todos os períodos analizados: 204%, en 2019; 183%, en 2020; e 284%, nos nove primeiros meses de 2021.
Entre xaneiro e setembro o xulgado ingresou 1.722 procedementos e resolveu 1.831, un 43,2% máis que no mesmo periodo de 2020. Os asuntos en trámite ao finalizar o terceiro trimestre deste ano ascenderon a 1.019, un 32,4 % menos que nas mesmas datas de 2020, a pesar de que nese período o órgano ingresou un 19,5 % máis de procedementos que o ano anterior.
