O PP lamenta o "triunfalismo" do Goberno central con Alcoa: "Deuse a solución que ninguén quería, parar as cubas"
"Por primeira vez en moitos anos, España non ten ningún punto para fabricar aluminio primario", critica o vicesecretario de Participación do partido, Jaime de Olano.
Por E.P. | Lugo | 04/01/2022 | Actualizada ás 15:30
O vicesecretario de Participación do PP, Jaime de Olano, lamentou este martes en Lugo o "triunfalismo" do Goberno central con respecto ao futuro da planta de Alcoa, en San Cibrao, Cervo.
De Olano advertiu que a "solución que se lle deu a Alcoa é a solución que ninguén quería en ningún momento, que era parar as cubas".
"As cubas non van funcionar durante dous anos e España deixou de producir aluminio primario; por primeira vez en moitos anos, España non ten ningún punto para fabricar aluminio primario e isto é un fracaso da política industrial do Goberno derivada da nefasta política enerxética", censurou.
"Se non somos capaces de abaratar o prezo da enerxía as cubas en Alcoa non se volverán a pór en funcionamento", agregou, antes de aconsellar aos socialistas que "abandonen o triunfalismo porque ao final o que ocorreu é que a única fábrica de aluminio primario en España deixou de traballar e deixou de funcionar, polo menos por dous anos".
