A volta ciclista O Gran Camiño contará con equipos internacionais
Rueda destaca a carreira como "punto de partida da gran peregrinación a Galicia no 2022".
Por E.P. | Santiago de Compostela | 14/01/2022 | Actualizada ás 20:51
A volta ciclista O Gran Camiño percorrerá as catro provincias galegas entre o 23 e 27 de febreiro, nunha cita na que participarán equipos internacionais de primeiro nivel. Este evento, que se presentou este venres en Santiago, conta xa coa participación confirmada dos equipos: Movistar, Israel Start Up Nation, Education First, Cofidis, o portugués Tavira e Euskaltel Euskadi. Tamén tomarán a saída o 24 de febreiro o portugués RP-Boa Vista e os italianos Eolo Kometa, Androni Giocattoli e Bardiani.
Tras dúas décadas en suspenso, Galicia recuperará este 2022 unha volta ciclista profesional por etapas no seu territorio, na que se axuntará "espectáculo, valores deportivos e difusión turística".
Durante o acto, o vicepresidente primeiro da Xunta, Alfonso Rueda, destacou a esta volta de catro etapas como "punto de partida da gran peregrinación a Galicia no 2022".
"Percorre todas as provincias galegas, realízase por etapas e defende os valores da perseveranza, a constancia e o esforzo para chegar á meta en Compostela", subliña.
A carreira arrincará na provincia de Pontevedra, para pasar logo á Coruña e a Ourense, onde será a etapa raíña. Para concluír, os ciclistas rodarán en Lugo, transitando o máis importante dos camiños a Santiago, a vía francesa.
