O PSdeG dá "uns días" a Caballero para recolocarse no grupo parlamentario socialista

O portavoz parlamentario do PSdeG, Luís Álvarez, estreouse este martes na xunta de portavoces, tras a cal pediu a "benevolencia" dos medios para poder asentarse neste cargo, no que substitúe a Gonzalo Caballero, que tamén era o secretario xeral do PSdeG ata o proceso de primarias que perdeu contra Valentín González Formoso.

Preguntado por se concluíu a renovación do grupo e de áreas, tras a designación este luns dos portavoces suplentes --Begoña Rodríguez Rumbo, Julio Torrado e Leticia Gallego--, agora deron uns días de prazo para terminar de reestruturar o grupo, aínda que Luís Álvarez é partidario de manter a esencia, posto que, dixo, funcionaba correctamente.

O novo portavoz indicou que Gonzalo Caballero "vai ter liberdade de decidir a que ámbitos se quere incorporar" e indicou que "terá que ser responsable dalgunha área". Ao seu xuízo, sería "magnífica" a súa incorporación ao ámbito económico, pero pediu uns días para "meditar que áreas e responsabilidade".

Unha vez sexa trasladada esta cuestión, farase "unha reestruturación de competencias", aínda que sinalou que a súa "pretensión" é que "sexa a mínima", porque "o grupo estaba a facer un bo traballo, con deputados serios e solventes nas súas áreas". "Haberá que facer os mínimos cambios nas áreas", sostivo.

Pola súa banda, o portavoz do Grupo Popular, Pedro Puy, mostroulle os seus bos desexos e sinalou que, como así se fixo constar a instancias da Presidencia do Parlamento, fíxose un recoñecemento ao labor da anterior dirección do grupo, na que tamén estaba o coruñés Pablo Arangüena.

Mentres, a viceportavoz do BNG, Olalla Rodil, manifestou os "bos desexos" ao novo portavoz ante a nova responsabilidade que asume, sen querer entrar en se a relación será diferente con respecto á anterior dirección, debido a que eran habituais as críticas de Arangüena cara ao BNG.

Rodil defendeu que "o BNG está centrado en defender os dereitos deste país" e en "pór iniciativas encima da mesa que melloren l a situación dos galegos". "É o único que nos ocupa e preocupa", sinalou a deputada nacionalista, quen dixo que "persoalmente" ela ten unha "moi boa relación" con Álvarez, porque ademais "é de Lugo" como ela, incidiu.

Luís Álvarez e Begoña Rodríguez Rumbo, na primeira xunta de portavoces do Parlamento de Galicia tras a substitución de Gonzalo Caballero. PSDEG | Fonte: Europa Press