Insisten na necesidade de que os gobernos de Portugal e España asinen un estatuto do traballador transfronteirizo

A Eurorrexión Galicia-Norte de Portugal e a Confederación de Empresarios de Galicia (CEG) asinaron este venres un protocolo de cooperación co obxectivo de potenciar, aumentar e fortalecer o desenvolvemento socioeconómico da rexión, a través de iniciativas conxuntas. Así, o director da Agrupación Europea de Cooperación Territorial da Eurorrexión (GNP-AECT), Nuno Almeida, rubricou o documento xunto co presidente da organización empresarial galega, Juan Manuel Vieites.

Almeida lembrou que a Eurorrexión ten entre os seus obxectivos colaborar coas empresas de ambos os lados da fronteira para fomentar o tecido empresarial a través do coñecemento e da innovación.

No seu discurso, insistiu na importancia de que os gobernos de Portugal e España asinen un estatuto do traballador transfronteirizo, sobre todo despois dos problemas que isto supuxo durante a pandemia, cando as fronteiras estaban pechadas. Neste sentido, mostrouse esperanzado con que se materialice este ano.

Pola súa banda, Vieites puxo en valor que a pesar de que Galicia e Portugal non formen parte do mesmo país, as sinerxías compartidas e a identidade común en termos xeográficos e culturais "deben derivar na procura de alianzas en clave eurorrexional".

Tal como explicou, este convenio busca promover que a Eurorrexión sexa unha área de atracción de actividade e de asentamento industrial. Con todo, animou a que hai que facelo realidade e porse a traballar para que isto ocorra aproveitando os fondos europeos Next Generation e o próximo Programa Operativo de Cooperación Transfronteiriza España-Portugal 2021-2017 (Poctep), que na súa anterior edición a Eurorrexión conseguiu situarse como a primeira en captación de investimentos con 163 millóns de euros para 85 proxectos.

Para el, a futura construción do eixo atlántico "vai na dirección correcta" e subliñou que deberían utilizarse os fondos europeos para seguir por esa liña e ampliala tamén ao tráfico de mercadorías e non só de persoas.

SAÍDA DE EMPRESAS

O presidente da CEG, Juan Manuel Vieites, pediu este venres que se axilicen os procesos administrativos para poder así reindustrializar Galicia ante a saída de empresas cara a Portugal.

O presidente dos empresarios galegos indicou que as compañías buscan ser cada vez máis competitivas e eficaces, polo que tratan de atopar a mellor contorna para producir os seus produtos. Por iso, segundo el, é importante mellorar cuestións en Galicia, relacionadas coa burocratización dos procesos, as licitacións e os procedementos administrativos. "En definitiva, a axilización de todos eses procesos", subliñou.