Por E.P. | SANTIAGO DE COMPOSTELA | 08/02/2022 | Actualizada ás 13:29
A conselleira de Infraestruturas, Ethel Vázquez, avisa de que "o AVE a Galicia pode quedar coxo" se non se cambia o actual ancho ibérico de vía a internacional entre Santiago e Ourense. En declaracións aos medios nun acto en Crecente, a conselleira explicou que solicitou ao Ministerio de Transportes unha reunión para abordar un informe realizado pola Xunta en relación coa planificación necesaria que posibilite o cambio de ancho de vía de ibérico a internacional.
E é que alerta de que a non existencia de ancho internacional "impide que trens de alta velocidade entre Santiago e Ourense poidan circular a 300 quilómetros hora", polo que "teñen que facelo a 220 quilómetros por hora como consecuencia dese ancho de vía ibérico na rede galega". "Vemos que, se non se procede a ese cambio de ancho de vía, non se sacará o máximo rendemento de alta velocidade a Galicia e a alta velocidade a Galicia pode quedar coxa", asegura.
A conselleira critica que se "impide que se cumpran eses tempos comprometidos e competitivos de alta velocidade a Galicia ao resto de cidades galegas". Ethel Vázquez apunta que o AVE "só chegou a Ourense", pero están "preocupados como vai chegar alta velocidade ao resto de cidades".
Igualmente, quéixase de que "se condiciona o futuro da alta velocidade en Galicia por diferentes motivos", posto que "se impide a entrada de novos operadores privados diferentes a Renfe que poderían ofrecer máis frecuencias e tempos máis económicos". "As expectativas de alta velocidade a Galicia non se cumpren, as expectativas dos galegos non se cumpren", quéixase a conselleira de Infraestruturas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.