Os menores galegos de 10 a 16 anos, os que menos móbiles teñen

O 98 por cento dos menores españois con idades comprendidas entre 10 e 15 anos utiliza Internet de forma habitual desde que comezou a pandemia en España, cando se decretou o estado de alarma en marzo de 2020. En canto ao teléfono móbil, seis de cada dez ten un en Galicia, pero son os que menos posúen este tipo de aparello no conxunto de España.

Un estudo recente chamado 'O uso da tecnoloxía polos menores' e publicado polo Observatorio Nacional de Tecnología y Sociedad (ONTSI), dependente da Secretaría de Estado de Dixitalización e Intelixencia Artificial, determinou o impacto da Covid-19 no uso de dispositivos e Internet en España.

O estudo revela que a crise sanitaria derivada da pandemia impulsou a utilización de dispositivos conectados a Internet entre os menores de 10 a 15 anos, quen se tiveron que adaptar ás novas circunstancias na contorna educativa. As persoas incluídas neste rango de idade convertéronse nos principais consumidores de contido na contorna dixital grazas ao uso de redes sociais, aplicacións ou plataformas a través de 'smartphones', computadores e tabletas.

Actualmente, en España o 98 por cento dos menores de 16 anos utiliza Internet, unha porcentaxe que se incrementou desde 2016 (cando non chegaba ao 93%), especialmente nos últimos dous anos. As condicións familiares, xunto co nivel de ingresos e a situación xeográfica, determinan en gran medida o acceso tanto a Internet como ás novas tecnoloxías.

Deste xeito, os menores que habitan en concellos pequenos, proveñen de fogares con baixos ingresos e forman parte dunha unidade familiar máis grande son os máis afectados e os máis vulnerables para sufrir a fenda dixital. Por ese motivo, o 98 por cento dos españois menores de 16 anos que utiliza Internet mantense nos fogares de renda alta e decrece nos de renda baixa (inferior a 900 euros), cando cae ao 92 por cento.

O uso de Internet tamén depende da situación xeográfica, xa que é menor o uso da rede entre os menores que viven en municipios pequenos fronte aos que viven noutros máis grandes, que se reflicte nun 1 por cento de diferenza.

USO DE 'SMARTPHONES'+

A adopción de teléfonos móbiles é inferior á de computadores, xa que sete de cada dez dispoñen deles; unha porcentaxe que se sitúa entre o 66 e o 69 por cento dos menores con 'smartphones' e que se mantivo nos últimos seis anos.

Neste caso, do mesmo xeito que ocorre cos computadores, o uso de teléfonos móbiles é maioritariamente feminino, cun 72 por cento de usuarias, fronte ao 65 por cento de usuarios menores de 16 anos.

A situación xeográfica tamén condiciona a posesión dun teléfono móbil, xa que este estudo revela que nos concellos máis pequenos rexístrase unha maior porcentaxe de usuarios con respecto aos máis grandes, sendo a fenda dixital de 4,6 puntos porcentuais.

Así mesmo, a estrutura familiar tamén é capaz de provocar diferenzas, xa que nos fogares con só dous membros o uso do móbil é máis habitual que nas familias con cinco ou máis integrantes. A diferenza radica en 12 puntos porcentuais, é dicir, un 74 por cento fronte ao 62 por cento.

En relación aos ingresos mensuais, os fogares con rendas interiores a 900 euros presentan unha porcentaxe inferior de menores con teléfonos móbiles (un 57%), unha cifra que se eleva ata o 71 e 72 por cento en unidades familiares con ingresos medios (de 900 a 1.600 e de 1.600 a menos de 2.500, respectivamente).

Por último, nos fogares con ingresos altos, as porcentaxes son do 67 por cento (de 2.500 a menos de 3.000 euros) e do 66 por cento (desde 3.000 euros en diante).

As Comunidades nas que máis menores de 16 anos teñen móbil son Estremadura (cun 82%) e País Vasco (76%). No outro extremo sitúanse Melilla (60%) e Galicia (59%).