Arquivada a investigación sobre supostas irregularidades no Consorcio das Mariñas
O xulgado entende que non está debidamente xustificada a perpetración do delito de prevaricación administrativa.
Por E.P. | A CORUÑA | 28/02/2022 | Actualizada ás 17:57
O Xulgado de Instrución número 2 de Betanzos confirmou o sobresemento provisional e arquivo das actuacións nas que se investigou, por mor dunha querela interposta polo Concello de Oleiros, supostas contratacións irregulares por parte de diversos cargos do Consorcio das Mariñas.
A maxistrada, nun auto notificado este luns, desestimou o recurso de reforma interposto polo Concello de Oleiros contra o auto de 29 de xuño de 2021 no que decretou o sobresemento por non estar debidamente xustificada a perpetración do delito de prevaricación administrativa.
Na resolución, a xuíza indica que da documentación examinada e obrante na causa, así como das declaracións prestadas en calidade de investigados en sede xudicial polos querellados e da declaración da responsable da área de recursos humanos, "non pode atribuírse a concorrencia de acto ou feito con carácter delituoso a ningún dos denunciados, sen prexuízo de que puideren ou non ter cabida noutra vía xurisdicional como a contencioso-administrativa ou, mesmo, a xurisdición social".
A maxistrada lembra que, segundo a xurisprudencia, para que poida advertirse unha prevaricación a resolución de que se trate "haberá de ser de tal entidade que non poida ser explicada por medio de argumentación técnico-xurídica minimamente aceptable en dereito administrativo; ocasionando un resultado materialmente inxusto e ditada coa inequívoca finalidade de facer efectiva a vontade particular da autoridade ou funcionario e co coñecemento de actuar contra o dereito".
Ademais, resalta que, xunto ao requisito da arbitrariedade ou inxustiza do acto ditado, debe sumarse que a persoa debe actuar "con intención deliberada e plena conciencia da ilegalidade do acto realizado, así como de estar a resolver á marxe do ordenamento xurídico e ocasionando un resultado materialmente inxusto, a pesar do cal actúa antepondo o contido da súa vontade a calquera outro razoamento ou consideración".
Neste caso, conclúe que "non concorren os orzamentos necesarios para que poida ser reprochada en vía penal a actuación dos querellados" e, en consecuencia, desestimou o recurso.
